İnsan orqanizminə hər gün qida, hava, su ilə bərabər müxtəlif ziyanlı maddələr də daxil olur.

Digər tərəfdən ziyanlı maddələr orqanizmin özündə müxtəlif proseslərin nəticəsində əmələ gəlir. Mükəmməl yaradılmış insan orqanizmində bu ziyanlı maddələrdən təmizlənmək üçün bir neçə "təmizləyici" sistem var. Qara ciyər, böyrəklər, bağırsaqlar, dəri orqanizmi hər dəqiqə ziyanlı maddələrdən təmizləyir. Lakin bəzən orqanizmə düşən və ya burada əmələ gələn ziyanlı maddələrin həcmi o dərəcədə çox olur ki, orqanizm təmizləmə işinin öhdəsindən tam şəkildə gələ bilmir. Nəticədə orqanizmdə müxtəlif pozulmalar inkişaf edir - allergiyalar, immun sisteminin zəiflənməsi, dəri və saç problemləri, ürək, qara ciyər və s. xəstəliklərinin inkişafı.

Bəzi məhsullar var ki, bu məhsullar orqanizmdən ziyanlı maddələrin çıxarılmasını sürətləndirir. Bu məhsullar arasında:

- Kələm. Qidalı liflərlə olduqca zəngin olan kələm bağırsaqları əsaslı şəkildə təmizləyir, burada yığılan toksinlər və ağır metalların xaric olunması prosesini sürətləndirir. Bundan əlavə kələmdə nadir U vitamini var ki, bu vitamin ziyanlı maddələri öldürür.

Kələmi çiy şəkildə qəbul etmək daha yaxşıdır. Lakin bəzi insanlarda bu meteorizm (köp), qarında ağrılara və s. xoşagəlməz hisslərə səbəb olur. Bu halda kələmi pörtlədilmiş şəkildə qəbul etmək olar.

Kələm şirəsi də olduqca xeyirli məhsuldur. Belə hesab olunur ki, kələm şirəsi mədədə və 12 barmaq bağırsağında xoraları sağaldır.

- Çuğundur bağırsaqlar üçün 1 nömrəli təmizləyicidir. Çuğundur bağırsaqların mikroflorasını yaxşılaşdırır - pis bakterilərlə mübarizə aparır, yaxşı bakterilərin sayının artmasına kömək edir. Digər tərəfdən çuğundurda olan "betain" maddəsi qara ciyərdə təmizləmə prosesləri sürətləndirir.

Çuğundur bişmiş şəkildə qəbul olunmalıdır. Çuğundur şirəsi də çox xeyirlidir. Çuğundur şirəsinin yarıbayarı kök şirəsi ilə qarışdırıb qəbul etmək tövsiyə edirlər. Belə şirə orqanizmi cavanlaşdırır və təmizləyir.

- Sarımsaq məşhur iltihab və mikrobəleyhinə vasitədir. Sarımsağın damarları xolesterindən təmizləmək xüsusiyyəti tibbdə çoxdan təsdiq olunub. Həmçinin sarımsaq orqanizmi burada yaşayan və allergiya, immunitetin zəifləməsi və s. problemlər yaradan qurdlardan təmizləyir.

Sarımsağı çiy şəkildə qəbul etmək lazımdır. Gün ərzində 1 diş sarımsaq yeyən insan özünün bir çox sağlamlıq problemlərindən sığortalaya bilər.


- Sarımsaq kimi, soğan da fitonsidlərlə zəngindir. Bu maddələr bir çox ziyanlı mikrobları və göbələkləri öldürür.

Soğanı çiy şəkildə qəbul etmək daha yaxşıdır.

- Pektin və liflərlə zəngin olan alma bağırsaqları şlaklar və toksinlərdən təmizləyir.

Almanı çiy şəkildə qabığı ilə birlikdə yemək lazımdır. Alma şirəsi də çox xeyirlidir.

- Təəssüf ki, avokado bizdə çox populyar deyil. Bütün dünyada bu məhsul qara ciyər üçün ən faydalı məhsullardan biri sayılır. Avokado qara ciyəri çox yaxşı təmizləyir, onun funksiyasını yaxşılaşdırır, orqanizmi artıq xolesterindən azad edir.

Avokado çiy şəkildə yeyilir.