Son 30 ildə ilk dəfə olaraq sərnişin təyyarəsi Ermənistanın hava məkanı vasitəsilə Azərbaycanda daxili uçuş həyata keçirib.

Azia.az xarici mediaya istinadən xəbər verir ki, Türk Hava Yollarının “Boeing -737” təyyarəsi sentyabrın 4 -də “TK326 Gəncə – Naxçıvan” reysini həyata keçirib. Təyyarə Gəncədən saat 9.57-də (5.57 UTC) havaya qalxıb və 10.32-də (6.32 UTC) Naxçıvana enib. Uçuş müddəti 35 dəqiqə olub. Uçuş Radarına görə, təyyarənin marşrutu Göyçə gölü (Sevan) və Ermənistanın Geqarkunik (Göycə mahalı) bölgəsi olub.

“Bu iş İrəvanın bütün qisasçı bəyanatlarına baxmayaraq, Ermənistanın Azərbaycanla münasibətləri normallaşdırmaq perspektivinə müqavimət göstərə bilmədiyini təsdiq edir” –deyə “Vestnik Kavkaza”ın baş analitiki Andrey Petrov vurğulayıb.

Nəşrin baş analitiki Andrey Petrov əlavə edib ki, Ermənistan hakimiyyəti mümkün qədər daxildə və diasporla problemlərin olmaması üçün rəsmi açıqlama vermədən hava məkanını sakit açmağa çalışıb. “Ermənistan hakimiyyəti bu hadisə ilə ölkə iqtisadiyyatına və cəmiyyətinə mümkün qədər çox fayda gətirməyə çalışır” – deyə Andrey Petrov fikirlərini tamamlayıb.