ABŞ Mərkəzi Kəşfiyyat İdarəsinin (MKİ) məlumatından sonra Yunanıstan Hərbi Hava Qüvvələrinə məxsus iki F-16 qırıcısının müşayiəti ilə “Emirates” şirkətinin təyyarəsi Afinaya qayıdıb.

Xəbər verilir ki, bu barədə Yunanıstanın “Newsbomb” portalı məlumat yayıb.

Bildirilib ki, MKİ “Emirates”in iki reysindən birində terrorda şübhəli bilinən ərəb əsilli şəxsin olması barədə Yunanıstan tərəfinə məlumat verib.

Hava limanının rəhbərliyi Dubaya uçan birinci təyyarəni havaya qalxmazdan əvvəl dərhal dayandırıb və ikinci təyyarənin geri qayıtmasına göstəriş verib.

Yunanıstanın Terrorla Mübarizə və Kəşfiyyat Xidməti (EYP) birinci təyyarədə axtarış aparıb və şübhəli heç nə tapmayıb. Üç saatlıq gecikmədən sonra təyyarənin qalxmasına icazə verilib.

Məlumata görə, sərnişinlər arasında terror şübhəlisinin ola biləcəyi barədə Nyu-Yorka gedən ikinci reysin pilotuna xəbərdarlıq edilib.

Fransa və İtaliya öz hava limanlarına eniş icazəsi verməkdən imtina etdiyi üçün hava gəmisi Afina Beynəlxalq Hava Limanına getməli olub.

Qeyd olunub ki, NATO təyyarəni müşayiət etmək üçün iki F-16 qırıcısına havaya qaldırıb.

Yunanıstan polisindən verilən məlumata görə, aparılan axtarışlar zamanı ikinci təyyarədə şübhəli heç nə aşkar edilməyib.

İqbal Rzayev,