Xəbər verdiyimiz kimi, 2026-cı ilin yanvar–iyun aylarını əhatə edən TOP-15 reytinq cədvəlinin nəticələri açıqlanıb. Ümumilikdə 32 fərqli veriliş və televiziya yayımı daxil olub. Nəticələrə əsasən AzTV, ARB 24, Real TV, Mədəniyyət TV, İdman TV və digər televiziya kanallarının heç bir proqramı 2026-cı ilin ilk yarısında açıqlanan TOP-15 reytinq siyahısına düşə bilməyib. Ən çox izlənilən televiziya proqramı Xəzər TV-də yayımlanan “Komedixana” verilişi olub. Bu da sosial şəbəkələrdə müzakirələrə səbəb olub. Bəziləri auditoriyanın intellektual səviyyəsinin düşdüyünü desələr də, digərləri insanların ağır iş rejimindən sonra əyləncə üçün o tip verilişlərə baxmasının normal olduğu bildirirlər.

Mövzu ilə bağlı Pravda.az-a açıqlama verən media eksperti, professor Qulu Məhərrəmlinin sözlərinə görə, bəzi telekanallar SMM-i yaxşı qurduğu üçün həmin verilişlərin bir çoxu sosial şəbəkələrdə izlənilir: “Auditoriyanın marağı əlbəttə ki, əyləncəli, şou proqramlarla çox bağlıdır. Bu səbəbdən “Komedixana” verilişinə çox baxılmasına təəccüblənmirəm. Geniş mənada götürdükdə bu özü də televiziya verilişi deyil, maraqlı layihədir, xüsusilə sosial şəbəkələrdə çox baxırlar. Amma bu reytinq müəyyənləşdirməyin metodologiyasına iradımı bildirmək istəyirəm. Yaxşı olar ki, gələcəkdə proqramların differensasiyası üzrə bu sorğular aparılsın: Xəbər, analitik proqramlar, əyləncə-şou verlişləri kimi kateqoriyalar üzrə hansı proqram daha yaxşı izlənilir, müəyyənləşdirilsin. Yoxsa hansısa əyləncə proqramı ilə xəbər proqramını yanaşı qoyduqda əyləncəli verlişlərin tamaşaçısı çox olur. Ona görə də burada bir anlaşılmazlıq ola bilər. Bütövlükdə götürüldükdə insanın təbiəti əyləncəyə meyllidir. Xüsusilə Azərbaycan kimi ölkələrdə auditoriyanın şou-əyləncə tələbatı daha çoxdur. Ona görə də belə mənzərə yaranır”.

Q.Məhərrəmli qeyd edib ki, televiziyalar sosial media marketinqini yaxşı qurmağa çalışır: “Xəzər TV-nin üstünlüyü odur ki, onlar sosial şəbəkələrdə daha fəaldırlar və hələ neçə il bundan əvvəl bir milyonluq “Youtube” izləyici xəttini keçib, baxanları çoxdur... Ona görə də bu proqramın yayılmağına, uyğun yeri tutmasına təəccüblənmirəm. Reallıq ondan ibarətdir ki, telekanallar sosial şəbəkə, piar, SMM-lə çox dərin texnoloji, yaradıcılıq, marketinq baxımından davamlı işləməlidir ki, həm verilişlər yayıla bilsin, orada müəyyən atmosfer yaradılsın, həm də televiziyanın reytinqini saxlaya bilsinlər”.

Şəhanə Qədirli