"Qarabağda qanunsuz silahlı dəstələrə qarşı hərbi əməliyyat keçirmək mümkündür, amma əvvəlcə Rusiya ilə anlaşmaq lazımdır".

Azia.az bildirir ki, bunu siyasi şərhçi Şahin Cəfərli deyib. Onun sözlərinə görə, bu cür əməliyyatın keçirilməsi Rusiyanın razılığı olmadan mümkün deyil:

"Amma Rusiya buna razı olacaqsa, hərbi əməliyyata nə ehtiyac? Rusiya istəsə, Ermənistandan gələn qüvvələri geri göndərər, yerli silahlıları da tərksilah edər və məsələ bir güllə atmadan 2-3 günə həll olunar. Əsas sual budur ki, Rusiya bunu istəyirmi? Rusiya münaqişə tərəflərindən birini ortadan qaldırıb, Qarabağ məsələsinə nöqtə qoymaqda maraqlıdırmı? Düşünürəm ki, yox. Ən azından hələ yox. Məsələnin komik tərəfi odur ki, bu cür situasiya (yəni tərəflərdən birinin yox olması) 10 noyabr bəyanatına da ziddir”.

Ş.Cəfərli xatırladıb ki, bəyanata əsasən, Qarabağda təmas xətti və qarşı duran tərəflər var:

"Bunlar aradan qalxacaqsa və Azərbaycanın suverenliyi Xankəndində təmin olunacaqsa, onda sülhməramlılar orada nə edəcək və ümumiyyətlə, Rusiya niyə bizə 10 noyabr bəyanatını imzalatdırırdı? Çünki özümüz onsuz da məsələni həll edirdik. Bir ehtimal qalır ki, Rusiya yerli ermənilərin təhlükəsizliyini təmin etmək üçün orada daimi hərbi baza yaratmağa Azərbaycanın razılığı müqabilində Xankəndidə Bakının hakimiyyətinin təmin olunmasına razılıq versin – SSRİ dövründə olduğu kimi”.