Bill Qeyts deyib ki, 2022-də inkişaf etməkdə olan ölkələrdə pandemiya bitəcək, gələn ilin yazında isə vaksinlər paylanacaq; Həmid Herisçi: “Dünya idarə olunan dövrə qədəm qoyur, bu xəstəlik var, sadəcə, ətrafında güclü manipulyasiyalar gedir”.
Dünya 2020-ci ilin əvvəlindən kabus yaşayır. Planetə gələn COVİD-19 bəlası ölkələrin və xalqların başı üzərindən çəkilmir, canından çıxmır.

Virus təkcə insanları yoluxdurmur, öldürmür, həm də bəşəriyyəti silkələyir, iqtisadiyyatları darmadağın edir, dövlətlərin büdcəsini böhrana salır, dünya əhalisinin gəlirlərini azaldır.

Bunun üstünə insanların yaşadığı psixoloji travmalar, karantin səbəbindən aylarla izolyasiya şəraitində yaşamaq depressiv mühit yaradıb.

“Azia.Az” bildirir ki, XXI əsrin ilk belə qorxunc panemiyası olan koronavirus qarşı ayrı-ayrı ölkələr vaksinlər hazırlasalar da, hələlik tətbiqinə başlanmayıb və dünyada gündəlik infeksiyaya yoluxma sayı durmadan artmaqdadır.

Bu kainatın bir parçası olan Azərbaycan da fevralın sonundan pandemiyanın qurbanlarından biri hesab edilə bilər. Martdan tətbiq edilən məhdudiyyətlərə, qadağalara baxmayaraq, yenə də yoluxma yüksək həddədir.

Bu səbəbdən dekabrın 14-dən yanvarın 18-nə qədər sərt karantin rejiminə keçirik, SMS icazə ilə gündə bir əfə 3 saatlıq küçəyə çıxmaq ixtiyarımız olacaq.

Qonşularımızda da vəziyyət ürəkaçan deyil - Türkiyə, Rusiya, Gürcüstan, İranda, o cümlədən Avropada yoluxmada kəskin artım var.

Ona görə aylardır ki, sərhədlər bağlanıb, təyyarələr demək olar uçmur, turizm sektoru tamamilə çöküb, evəqapanma insanların ruh halını dəyişib. Bu da özlüyündə dünyanın bütün nizamını pozub, həyatımızın ritmini korlayıb, 2020-ci il bəşəriyyət üçün itirilmiş təqvim hesab edilir.

Amma belə görünür ki, qarşıdan gələn 2021-ci il də pandemiya dövrü olacaq. Faktiki 31 yanvara qədər Azərbaycanda ümumi karantin rejimidir.

Qışda virusların tüğyan etdiyini və xəstəliyin yox olmasında irəliləyiş əldə edilmədiyini nəzərə alsaq, fevral və mart ayını da karantində keçirəcəyimiz ehtimalı güclənir. Yalnız yaz aylarında epidemiyanın səngiməsi proqnozlaşdırıla bilər.

Bu dünya bəs nə vaxt düzələcək? Ölkələri xaraba qoyan, milyon yarım insanın tələf olmasına gətirib çıxaran pandemiyadan necə, nə vaxt qurtulacağıq? Üstəlik, Çində başlayan bu xəstəlik həmin ölkədə tez bir zamanda aradan qaldırılsa da, dünyanı çənginə almaqda davam edir.

Maykrosoft" şirkətinin qurucusu Bill Qeyts deyib ki, 2021-ci ildə dünya ölkələrinə COVİD-19-a qarşı mümkün qədər çox peyvənd paylamağı planlaşdırırlar. Onun sözlərinə görə, beləliklə, 2022-ci ildə inkişaf etməkdə olan ölkələrdə pandemiya bitəcək:

“Peyvəndi bərabər şəkildə paylamağımız vacibdir. Varlı olmaq peyvəndin əlçatan olmasını müəyyən etməməlidir. Bu yerdə bizim fond - ”Bill & Melinda Gates" işə qarışır".

B.Qeyts vurğulayıb ki, vaksinlərin 2021-ci ilin yazına qədər paylanılması planlaşdırılır: “İnanıram ki, ”Pfizer-BioNTech" peyvəndi yaxın aylarda təsdiqlənəcək. Bununla yanaşı, “Moderna”, “AstraZeneca”, “Johnson & Johnson” və “Novavax” tərəfindən hazırlanan peyvəndlər də istifadə üçün təsdiqini tapacaq".

Çox maraqlıdır ki, ABŞ-ın “Pfizer” və Almaniyanın “BioNTech” şirkətlərinin birgə istehsal etdikləri vaksinin sınaq testləri nəticəsində 6 nəfər ölüb. Bu barədə ABŞ-ın Qida və tibbi ləvazimatların keyfiyyəti idarəsinin saytında yayılan məlumatda qeyd olunub.

Konspiroloq-yazıçı, telejurnalist Həmid Herisçinin “Yeni Müsavat”a bildirdiyinə görə, Bill Qeytsin gələcəkdən bu qədər xəbərdar olmağı şübhəli görünür. Onun fikrincə, elə bu cür insanlar pandemiyanın dramaturgiyasını qurur, xronologiyasını təyin edir:

Həmid Herisçi televiziyadan getməsini hekayəyə çevirdi: “İtlər vadisi”.

“Xəstəliyin modullaşdırılması - dramaturgiyası həmin adamların əlindədir. Bu mövzunu mass-mediada saxlayırlar.

Əslində peyvənd çoxdan var. Sadəcə, rəqabət gedir ki, Rusiya peyvəndi, yoxsa Amerika mənşəli vaksin öndə gedəcək...

Həmin peyvəndlərin kimlərə sırınacağı, nə qədər keyfiyyətli olacağı sual altındadır. Məsələn, Türkiyə və Rusiya birgə sanitar proses həyata keçirməyi planlaşdırırlar. Çünki Türkiyədə rus turist çoxdur.

Bundan əlavə, Türkiyə bir neçə peyvənd almaq istəyir, səhmləşdirməyi nəzərdə tutur. Ərdoğan bu məsələyə təkcə tibbi yox, siyasi-iqtisadi nəzərdən diqqət edir. İndi belə fikir var ki, rus peyvəndinin anbarı Türkiyədə olacaq. Nə qədər düzdür, əyridir, deyə bilmərik".

H.Herisçi hesab edir ki, dünya idarə olunan dövrə qədəm qoyur: “Hətta mikroblar da idarə olunur, lazım gələndə havaya buraxılır. Amma Avropadakı insanlar artıq üsyan edirlər.

Təbii ki, bu xəstəlik ciddi bəladır, sadəcə, ətrafında güclü manipulyasiyalar da gedir. Ona görə həqiqətlə yalanın zərrələrini ayırmaq lazımdır".

Tibb üzrə fəlsəfə doktoru Yazgül Abdiyevanın sözlərinə görə, ölkədə səhiyyə sisteminin üzərinə düşən yük getdikcə artır.

Oftalmoloq Yazgül Abdiyeva: Dünyada 2020-ci ilə qədər korluğun qarşısının 80 faiz alınması uğrunda mühüm addımlar atılır -
Y.Abdiyeva hesab edir ki, bir çox rayon və şəhərlərdə hərəkətə məhdudiyyətin qoyulması nəticəsində yoluxma sayının azalması mümkün ola bilər:

“Ümid etmək olar ki, sərt karantinin tətbiq ediləcəyi iki həftə ərzində insanların bir-biri ilə təması azalacaq və bu da sonda yoluxma sayının azalmasına səbəb olacaq”.

Professor Adil Qeybulla çıxış yolunun sərt karatin rejimi olduğunu qeyd edib: “Xəstəxanalar ağzına kimi doludur, yer yoxdur, hamı da narazılıq edir. Daha düşünmürlər ki, deyilənlərə əməl etmədik, ona görə də belə vəziyyət yarandı.

Vaksin ortaya çıxana kimi hansısa tədbir görülməlidir. Görünür, dövlət qurumları bunu nəzərdə tutublar". A.Qeybullanın fikrincə, karantin davranışlarını heç kəs gözləməyib.

Qeyd edək ki, dekabrın 9-na olan məlumata əsasən dünyada koronavirus infeksiyasına yoluxanların sayı 68 milyon 567 min 527 nəfərə çatıb.

Pandemiya qurbanlarının sayı isə 1 milyon 563 min 133 nəfərdir. İndiyədək 47 milyon 462 min 104 infeksiya daşıyıcısı xəstəlikdən sağalıb.

Koronavirus ötən ilin dekabrında Çinin Uhan şəhərində yayılmağa başlayıb. COVID-19 virusu 216 ölkədə qeydə alınıb.