Venesuela yaxın aylarda ciddi yanacaq böhranı ilə üzləşəcək.
Virtualaz.org xəbər verir ki, bu haqda Almaniyanın “Handelsblatt” qəzeti Latın Amerikasının konsaltinq şirkəti “Ecoanalitica”nın təhlillərinə əsasən yazır. Nəhəng neft ehtiyatlarına malik olan ölkənin tezliklə benzin və dizel qıtlığı ilə üzləşə biləcəyinin səbəbi isə ABŞ-ın Nikolas Maduronun rejiminə qarşı tətbiq etdiyi sərt iqtisadi sanksiyalardır.İlkin məlumatlara görə ölkədə yanacaq cəmi 6 həftəyə bəs edəcək, aprelin ortalarında yanacaq anbarları boşalacaq. Hazırda Venesuela sahillərində dəyəri 500 milyon dollar olan 8.4 milyon barrel neftlə yüklü 16 tanker dayanıb, ölkədə neft hasilatı gündə 1.49 milyon barrelə qədərə azalıb. Venesuelanın dövlət neft şirkəti sanksiyalara görə nefti sata bilmir, ölkənin özünün neft emalı zavodlarının gücü isə neftinn hamısını emal etməyə bəs etmir.


Artıq iki iri neftayırma zavodu fəaliyyətini dayandırıb. Onlar gündə cəmi 77 min barrel yanacaq istehsal edirdi. Daha bir neftayırma zavodu-“Paraquana” isə 940 min barrel istehsal gücünə malik olsa da cəmi 70 min barrel yanacaq istehsal edə bilir. Bu isə daxili bazarda tələbatı ödəməyə bəs etmir. Təkcə Venesuela donanması gündə 110 min barrel benzin və 80 min barrel dizel istehlak edir.Maduro rejimi problemi Hindistanın hesabına həll etməyə çalışır. Hindistan ABŞ-ın embarqolarından sonra Venesueladan neft almağa icazəsi olan yeganə ölkədir. PDVSA dövlət neft şirkətinin rəhbərliyi yeni təchizat bazarları axtarmaq üçün Asiya və Yaxın Şərq ölkələrinə səfərlər etsə də nəticə əldə edilməyib. Bu arada sanksiyalara görə Rusiyanın “Lukoil” şirkətinin beynəlxalq treyder şirkəti “Litasco” da Venesuelada əməliyyatlarını dayandırıb.

Bu barədə jurnalistlərə “Lukoil” prezidenti Vahid Ələkbərov bildirib. “Litasco” artıq Venesuelada işləmir, sanksiyalara qədər neftin satışı və çatdırılması üzrə əməliyyatlar olub. Ancaq sanksiyalar tətbiq ediləndən bəri bu əməliyyatlar aparılmır”-o deyib.