Simonyan Paşinyandan ayrıldı - Deputat mandatından imtina etdi

Azia.az Ölkə.az-a istinadən xəbər verir ki, bunu Ermənistan parlamentinin səlahiyyət müddəti bitmiş sədri Alen Simonyan qanunverici orqanın yeni tərkibində spiker postuna Ruben Rubinyanın namizədliyinin irəli sürülməsindən inciyib-incimədiyi ilə bağlı suala cavab verərkən bildirib.

O deyib ki, hakim “Vətəndaş Müqaviləsi” Partiyası İdarə Heyətinin qərarına tabe olur:

“Milli Məclisin sədri vəzifəsində qalmayacağam. Mən heç bir kin saxlamıram. İnanıram ki, iş prosesi bəzi dəyişikliklər tələb edir. Ümid edirəm ki, nə vaxtsa, hansısa vəzifədə ölkəmizə, partiyamıza faydalı olacağam. Bunu Baş nazir və İdarə Heyəti ilə müzakirə etdim. Mən mandatı qəbul etməyəcəyəm və parlamentə millət vəkili kimi qayıtmayacağam”, - A.Simonyan bildirib.

O, gələcək planları haqqında danışarkən deyib ki, bir az dincəlmək istəyir:

“İş baxımından mənim üçün çətin bir il oldu. Unutmayın ki, müharibədən sonrakı parlament bir çox çətinliklərə, çətin vəziyyətlərə dözən bir parlament idi və həmkarlarımla birlikdə gördüyüm iş həqiqətən çox çətin idi. Bununla belə, bir az dincəlmək istəyirəm. Mənim şəxsi həyatım var və nəhayət ki, bunu yenidən yoluna qoymaq istəyirəm. İstəyirəm ki, bir müddət mənim üçün darıxasınız və insanları çox yormaqdan çəkinmək istəyirəm”.

Xatırladaq ki, iyunun 7-da Ermənistanda parlament seçkisi keçirilib. Baş nazir Nikol Paşinyanın sədri olduğu “Vətəndaş Müqaviləsi” Partiyası qalib gəlib.  

Alen Simonyan da yeni parlamentin sədri vəzifəsinə namizədlər arasında idi. Lakin “Vətəndaş Müqaviləsi” Partiyasının İdarə Heyəti bu yaxınlarda onun deyil, Ermənistan parlamentinin hazırkı sədr müavini Ruben Rubinyanın namizədliyini təsdiqləyib.

Mürtəza