Qarabağ separatçılarının nümayəndələrinin Fransaya səfəri ətrafında yaranmış qalmaqal səngiməmiş, Paris növbəti antiazərbaycan insinuasiyası ilə fərqlənib.

Məlum olduğu kimi, Ermənistan parlamentinin sədri Alen Simonyan bu günlərdə Fransada səfərdədir. O, artıq Beşinci Respublika Milli Assambleyasının sədri Riçard Ferran və Senatın sədri Jerar Larşe ilə görüşlər keçirib.



Fransa Ermənistana rəğbətini heç vaxt gizlətməyib: burada təxminən 750 min etnik erməni yaşayır və onlar ölkədə fəal və geniş yayılmış lobbiçilik strukturu formalaşdıra bilmişlər. Deməli, Ermənistan rəsmilərinin Fransaya “məkik” səfərləri, demək olar ki, adi bir hadisədir.

Lakin son illər Ermənistanın rəsmi nümayəndələrinin demək olar ki, hər dəfə Parisə səfəri Azərbaycan Respublikasına və onun ərazi bütövlüyünə qarşı nümayişkaranə təxribatla nəticələnir.

Bu, bu dəfə də baş verib. Noyabrın 23-də Jerar Larşenin təşəbbüsü ilə Fransa Senatında “Bir ildən sonra Ermənistan” konfransı təşkil olunub və həmin konfransda artıq adı çəkilən Alen Simonyan əsas məruzəçi kimi çıxış edib.

Bu tədbir Fransa Senatının “Dağlıq Qarabağ Respublikasının tanınmasının zəruriliyi haqqında” bədnam qətnamənin qəbul edilməsinin ildönümünə həsr olunub. Tədbirdə çıxış edən Alen Simonyan bunu “tarixi hadisə” və “Fransa xalqının Ermənistan xalqı ilə həmrəyliyini nümayiş etdirməsinin yekdilliyinin nadir nümunəsi” adlandırıb.



Həmin gün Jerar Larşer və Alen Simonyan Fransa Senatı ilə Ermənistan Milli Assambleyası arasında əməkdaşlıq sazişi imzalayıblar. Diplomatik mənbələrdən alınan məlumata görə, belə bir sənədin imzalanması əvvəlcə planlaşdırılmayıb - Larşe və Simonyan bunu qeyri-rəsmi şəraitdə, birgə şam yeməyi zamanı ediblər.

Tələsik tərtib edilmiş və imzalanmış, necə deyərlər, diz üstü sənəddə, aşağıdakıları söyləyən preambuladan başqa, xüsusilə diqqətəlayiq bir şey yoxdur:

“Fransa Respublikası Senatının 25 noyabr 2020-ci il tarixində qəbul etdiyi qətnaməyə istinad edərək və Fransa hökumətini Dağlıq Qarabağ Respublikasını tanımağa, bu tanınmanı davamlı sülhün bərqərar olması məqsədi ilə danışıqlar alətinə çevirməyə dəvət edir”.

Xatırladaq ki, ilkin olaraq heç bir məcburi qüvvəyə malik olmayan və əslində sadəcə bir bəyannamə olan sənəd, 2020-ci ilin dekabrında Fransa hökuməti tərəfindən rədd edilib. Qeyd olunub ki, sənəd Fransa Respublikasının milli maraqlarına uyğun deyil.

Lakin bu, erməni tərəfinin hər küncdə, hər qapıda mənasız bəyanatdan fəal şəkildə istifadə etməsinə mane olmur.

Bu baxımdan erməni spikerin Fransaya səfəri Cənubi Qafqazda gedən müharibədən sonrakı proseslərə təsir edə bilməyən sıradan bir hadisədir.

Eyni zamanda ekspertlər Simonyanın Parisdə, necə deyərlər, rütbəsinə görə deyil, şərəfləndirilməsini qeyd edirlər və bu, təsadüfi deyil: Fransa paytaxtına səfərindən spiker ciddi siyasi dividendlər alaraq İrəvana qayıdır.



Paris Ermənistanın baş nazirinə müxalif olduğu bilinən erməni diasporunun mərkəzidir. Nikol Paşinyan Azərbaycanla müharibədə məğlubiyyətə, işğal olunmuş Qarabağın itirilməsinə, prezident Əliyevlə siyasi dialoqa görə bağışlanmayıb və heç vaxt bağışlanmayacaq...

Erməni diasporu uzun müddətdir ki, Paşinyanı devirmək planlarını qurur və onun yerinə uyğun adam axtarır, görünür, onu Simonyanda görüb.

Bunu Fransaya səfəri zamanı inandırıcı erməni millətçisi, ardıcıl qisasçı kimi keyfiyyətləri nümayiş etdirən və görünür, əcnəbi soydaşlarını öz seçimlərinin düzgünlüyünə inandıran Alen Simonyan da başa düşüb.

Bir sözlə, Fransa diasporu Ermənistanın gələcək baş nazirinin namizədliyi ilə bağlı qərar qəbul etmiş kimi görünür. Sadəcə, erməni xalqının bu seçimi dəstəkləyib-dəstəkləməyəcəyi bəlli deyil.
Müəllif: İlqar Hüseynov