"Özü də onların hec evə ehtiyacı da yoxdur. Horadizdə evləri var. Vəkilim bununla bağlı araşdırma aparıb və bu, sənədlər əsasında sübut olunub. Bunların Füzuli rayonundakı evləri hökumət tərəfindən bərpa olunub və orada qeydiyyatdadırlar. Ondan başqa Hökməli qəsəbəsində 3 villaları, hamısının da rəsmi sənədi var. Həmin şəxslərin qaçqın olduqları barədə sənədlər də saxtadır. Bu barədə mən Respublika Prokurorluğuna, Nizami rayon Prokurorluğuna, Daxili İşlər Nazirliyinə də müraciət etmişəm. Onlar bildiriblər ki, 1992-ci ildə qaçqın düşüb Sabirabad rayonunun Qalaqayın kəndində çadırda yaşayıblar. Sonra Bakıya, Yasamal rayonuna gəliblər. Daha sonra Niazmi rayonu, Babək prospekti, 61 ünvanında yaşayıblar. Ancaq belə bir ünvan yoxdur. Onların bunu təsdiq edən sənədi də yoxdur. Guya Sabirabdda 428 nömrəli çadırda yaşayıblar. Hamısı yalandır, bu sənədlər saxtadır. Onların qaçqınlığı yoxdur. Hətta Bakı Xətai rayonunda öz adlarına evləri var. Evləri olduğu halda saxta sənədlərlə orada qanunsuz tikinti aparıblar. Bütün bunların təqsiri Keşlə icra nümayəndəsindədir. Hamısını onlar edib".

Onu da qeyd edək ki, Bakı Şəhəri Nizami Rayon Polis İdarəsinin 23-cü polis bölməsinin Nizami RİH-nin başçısının birinci müavinin sorğusuna göndərdiyi cavabda məcburi köçkünlərin 2007-ci ilin yanvar ayından etibarən həmin əraziyə köçdükləri və oraya vaqon qoyaraq qeyri-qanuni tikinti işləri apardıqları bildirilir.