"55 hektar məndədir, bəs hanı kəndin mərkəzindəki 395 hektar?”

"Mənə məxsus təsərrüfatla bağlı edilən şikayətlərin heç bir əsası yoxdur. Mənim təsərrüfatım kənddən xeyli aralıda yerləşir”.

Bu sözləri "Ariz” Kəndli Fermer Təsərrüfatının rəhbəri Əli Bağış deyir.

Dekabrın 21-də Meydan TV Sabirabad rayonunun Əliləmbəyli kənd sakinlərinin şikayətini dərc edib.

Sakinlər kəndin kənarındakı otlaq sahəsinin bir-birinə qohum olan iki nəfərin əlində olduğunu deyirlər. Onların sözlərinə görə, 2001-ci ildə kəndin otlaq sahəsi "Ariz” Kəndli Fermer Təsərrüfatına 15 illiyə icarəyə verilib. 2016-cı ildə icarə müddəti başa çatsa da, sahibkar təyinatı otlaq sahəsi olan torpaqdan əkin sahəsi kimi istifadəyə etməyə başlayıb. Sakinlərin yerli qurumlara müraciətləri isə nəticəsiz qalıb.

Əli Bağış sakinlərin yalan məlumat verdiklərini deyir. O, söylədiklərini sənədlərlə də təsdiqləyir. Sənəddə göstərilir ki, şirkətin əvvəlki sahibi Bahəddin Cəfərovla Əliləmbəyli kənd bələdiyyəsi şurasının sədri Hümmət Həsrətov arasında 35 illik icarə müqaviləsi imzalanıb:

"”Ariz” şirkəti məndən əvvəl – 2001-ci ildə 35 illiyinə bələdiyyə ilə müqavilə bağlayıb. 2014-cü ilə qədər o ərazi ili 800 manata icarəyə verilib. Mən 2014-cü ildə subicarə ilə gəlmişəm və 2019-cu il, avqustun 21-də 100 faiz payla şirkəti almışam. Sırf sahibkar kimi fəaliyyət göstərirəm. Bələdiyyə vergisini də 2024-cü ilə qədər ödəmişəm. Deyilənlərin hamısı uydurma və yalandır, qərəzli və birtərəfli şəkildədir. Şirkəti mənim aldığımı biləndən sonra 2001-ci ildən verilən torpağa etiraz edirlər. Mən kimin torpağını almışam? O kəndin 450 hektar bələdiyyə torpağı var. Onun 55 hektarını mən götürmüşəm, 395 hektarı kimdədir? Mənim müəssisəm kənddən 3,6 km aralıdadır. Orda tövlələr, çoban evləri tikmişəm. Bu adamlar məndən nə istəyirlər? Gəlib audit etsinlər. Sahibkaram, əlimdə şəhadətnamə var ki, 35 il kənd təsərrüfatı məhsulları istehsal edə bilərəm. Müqaviləm 2036-cı ilə qədərdir. 4 rəsmi və mövsümi işçilərim var. Sıfırdan işə başlamışam və hazırda 700 baş xırda buynuzlu, 65 baş da iribuynuzlu mal-qaram var. Sənədlərimdə heç bir yanlışlıq yoxdur və o sənəd məhkəmə predmetidir. Mən məhkəməyə müraciət etmişəm. Yerli icra hakimiyyətindən də şikayətimi yazmışam. Çünki icra hakimiyyəti faktiki olaraq məni işləməyə qoymur. Onun tövsiyəsi əsasında mənim müəssisəmin protokolunu ləğv edib və məhkəmədə iddia qaldırıb”.

Sahibkar deyir ki, ona qarşı qalxanların əksəriyyəti bələdiyyə torpaqlarını zəbt edənlərdir: "Gah yazırlar 55 hektarımızı əlimizdən alıb, gah deyirlər guya mən SOCAR-ın əməkdaşıyam. Mən SOCAR-ın əməkdaşı deyiləm, birgə müəssisəsinin baş mühasibiyəm. 30 ildir neft sənayesində işləyirəm.

O adamlar yazır ki, onlar düz kəndin mərkəzində bələdiyyənin inkişaf torpaqlarını zəbt edib, pulla "kupça” alıblar. Mənim torpağım isə kənddən aralıdır. Yenə deyirəm, 55 hektar məndədir, bəs hanı kəndin mərkəzindəki 395 hektar? Bunu etmələri sırf paxıllıqdandır. Görürlər ki, mənim təsərrüfat müdirim işi hesabına maşın, ev əldə edib, düşünürlər niyə olsun”.

Əli Bağış deyir ki, bu adamlar təkcə şikayət etməyiblər, ona maddi ziyan da vurublar: "Heyvanları qış mövsümündən çıxarmaq üçün arpanı əkirsən, yanvardan martın 20-dək heyvanı orda otarırsan, sonra azot verirsən, iyunda da biçirsən. Dekabrın 4-5 və 7-də qoyunları mənə məxsus həmin o 3 km-lik sahəyə salıblar. "Bizə icra hakimiyyəti deyib” söyləyərək palçıqlı gündə qoyunları orda otarıblar. Bu, azmış kimi video çəkiblər, cənab prezidentin "noldu, Paşinyan?” fikrini də ora yazaraq paylaşıblar və məni Paşinyan kimi təqdim ediblər. Yağışlı havada qoyunu ora buraxmaq əkini məhv etmək deməkdir. Sadəcə qisasçılıq hissidir və bunu da etdilər”.

Sabirabad Rayon İcra Hakimiyyəti Meydan TV-yə kəndlilərin tələblərində haqlı olduğunu, Əliləmbəyli kənd bələdiyyəsi isə icra müqaviləsinin ləğvi üçün Sabirabad Rayon Məhkəməsinə müracət etdiyini bildirib.