Ramiz Mehdiyev barəsində həbs qərarı elan olunduqdan sonra bir qrup deputat sanki yarışa çıxıb. Onlar Prezident Administrasiyasının sabiq rəhbərinin ünvanına sərt ifadələr səsləndirir, onunla heç bir zaman əlaqələrinin olmadığını iddia edirlər. Hətta bəzilərinin ürəyi soyumur və müəllif yazısı ilə çıxış edərək, R.Mehdiyevin ünvanına çox ağır ifadələr işlədirlər. Bunların əksəriyyəti vaxtilə R.Mehdiyevin yaxın çevrəsinə aid olan şəxslərdir - kimisi onun dəstəyi ilə mandat qazanıb, kimisi də müxtəlif imtiyazlardan yararlanıblar. 

Məsələn, Demokratik Maarifçilik Partiyasının sədri, millət vəkili Elşən Musayev kimi… 

20 oktyabr 2025-ci ildə qafqazinfo.az saytında “Allah vurub Ramiz Mehdiyevi də, onun “komanda”sını da...” sərlövhəli məqalə dərc olunub.

Məqalənin müəllifi olan millət vəkili Elşən Musayev yazır: “…Kirayələrdə çürüdüyüm dövr məhz Ramiz Mehdiyevin vəzifədə olduğu dövrlə üst-üstə düşür…”. 

Halbuki, 2012-ci ilin qış aylarında Ramiz Mehdiyev BŞİH-in sabiq başçısı Hacıbala Abutalıbova zəng edərək Elşən Musayevə mənzil verilməsi barədə göstəriş verib. Bununla da, E.Musayevə “Şamaxinka” deyilən ərazidə yerləşən və yeni tikili binada 3 otaqlı mənzil hədiyyə olunub. 

Bu həmin dövr idi ki, E.Musayev cırıq ayaqqabılarla, nimdaş paltoda şəhər küçələrində gəzirdi və bu üsulla da özünün məzlum obazını yaratmağa nail olmuşdu. 

Bəlkə də sənin evinin divarlarında Ramiz Mehdiyevin kölgəsi qalıb, diqqətlə bax!

E.Musayev həmin məqalədə daha sonra yazır: “Bəlkə də uzun illər siyasətlə məşğul olan tək - tük adamlardan biriyəm ki, həyatım boyunca bircə dəfə də olsun, nə Ramiz Mehdiyevlə yolum kəsişib, nə onunla telefonla danışmışam, nə köməkçisinə zəng edib görüş istəmişəm, nə bir masada əyləşmişəm, nə xeyirində - şərində iştirak etmişəm, nə məktub yazmışam, nə də hardasa əl verib görüşmüşəm”. 

Bu da ağ yalandır! Nə üçün? 

Çünki həmin mənzil hədiyyəsindən öncə o, Ramiz Mehdiyevin qəbulunda olub. Ramiz Mehdiyev onu atasının - mərhum Məmmədhənifə Musayevin dostu kimi qarşılayıb, xoş sözlər deyib və dəstəyini bildirib. Qeyd edim ki, E.Musayevin atası M.Musayev Azərbaycan Pedaqoji Kadrların İxtisasının Artırılması və Yenidən Hazırlanması Baş İnstitutunun rektoru (1999 - 2001) və Azərbaycan Müəllimlər İnstitutunun rektor əvəzi (2001-2004) olub.

Ramzi Mehdiyevin ev hədiyyəsindən və diqqətindən təsirlənən E.Musayev 16 mart 2012-ci ildə qafqazinfo.az saytına razılaşdırılmış müsahibə verir. 

O, həmin müsahibədə deyir: “Ramiz Mehdiyev hər yoldan keçənə cavab verəcəksə o zaman biz kimik? Nə deyib ortada gəzirik? Məni narahat edən məsələnin bu tərəfidir”.

Göründüyü kimi, E.Musayev “dövlətçi” qiyafəsinə girərək özünü Ramiz Mehdiyevin fədakar xidmətçisi-müdafiəçisi kimi önə çəkir.

Heç şübhəsiz, uzun illər dövlət idarəçiliyin ən üst iyerarxiyasında mühüm post tutan Ramiz Mehdiyev barəsində açılmış cinayət işi dövlət qurumlarının səlahiyyətində olan məsələdir. Onun hüquqi tərəfi barədə hökm çıxarmaq cəmiyyətin yox, dövlət sisteminin işidir. 

Amma məsələnin mənəvi tərəfi daha dərindir. Elşən Musayev kimilər riyakarlıq nümayiş etdirməklə cəmiyyətdə çox pis presedentlər yaradırlar. Kəskin mövqe dəyişikliyi, keçmişə qarşı “moral qisas” ritorikası cəmiyyətdə ciddi etimad böhranı yaradır. Xalq görür ki, dünən “ustad” dediklərinə bu gün “tanımıram” deyənlər sabah kiminsə qarşısında yenidən eyni davranışı sərgiləyə bilər. Deputatlara qarşı olan qıcıq, qəzəb boş yerə deyil ki?! Bəzi istisnalar olmaqla, hansı deputat danışırsa, özünü batırır. Ramiz Mehdiyevin həbsi hər nə qədər müzakirə olunursa, Elşən Musayevin də elastik mövqeyi bir o qədər ikrah doğurur. 

Müəllif: Samir Feyruzov