ABŞ-də bir çox insan üçün orta təbəqədə qalmaqla uzunmüddətli sərvət toplamaq arasındakı əsas fərq qazancın həcmi deyil, əldə olunan vəsaitin necə idarə edilməsidir.

Daşınmaz əmlak investoru və özəl investisiya fondunun rəhbəri Qrant Kardon hesab edir ki, məhz investisiya vərdişləri insanların maliyyə gələcəyini müəyyənləşdirir.

Onun fikrincə, varlı insanları orta təbəqədən fərqləndirən üç əsas investisiya yanaşması var:

Birinci qayda: pulu yığmaq yox, investisiya etmək

Qrant Kardon bildirir ki, fövqəladə hallar üçün ehtiyat vəsaitinin olması vacibdir. Lakin böyük məbləğdə pulu bank hesabında saxlamaq uzunmüddətli gəlirləri məhdudlaşdıra bilər.

“Pulunuzu sadəcə yığmayın. Onu mütləq hansısa aktivə yatırın. Yığım deyil, investisiya gələcək sərvətin əsasını təşkil edir”, – deyə o bildirib.

İkinci qayda: qısamüddətli dəyişikliklərə deyil, uzunmüddətli hədəfə fokuslanmaq

Kardonun sözlərinə görə, bazarlardakı eniş-yoxuşlar, geosiyasi hadisələr və gündəlik xəbərlər uğurlu investorların strategiyasını dəyişmir. Onun fikrincə, varlı insanlar hər həftə investisiya planlarını yeniləmir, müvəqqəti tendensiyaların arxasınca getmir və uzunmüddətli yanaşmaya üstünlük verirlər.

Kardon əlavə edib ki, investisiya etdikdən sonra bazarı hər gün izləməyə ehtiyac yoxdur.

“Mən "Bitcoin" alıram və ona baxmıram. Üç ildən sonra qiymətə baxanda nəticə məni təəccübləndirə bilər”, – deyə o vurğulayıb.

Üçüncü qayda: diqqəti az sayda investisiyaya yönəltmək

Maliyyə məsləhətçiləri adətən risklərin azaldılması üçün investisiyaların şaxələndirilməsini tövsiyə etsələr də, Kardon hesab edir ki, böyük sərvət daha çox kapitalın az sayda perspektivli aktivdə cəmləşdirilməsi ilə formalaşır.

“Çox varlı insanlar investisiyalarını onlarla müxtəlif sahəyə bölmür. Onlar əsas gəlirlərini iki və ya üç istiqamətdən əldə edirlər”, – deyə o bildirib.

Bununla belə, Kardon qeyd edir ki, bu yanaşma hər investor üçün uyğun olmaya bilər. Onun sözlərinə görə, uğurlu sərvətin formalaşmasının əsas şərtləri məqsədyönlü qərarlar qəbul etmək, səbirli olmaq və uzunmüddətli strategiyaya sadiq qalmaqdır.

Qeyd edək ki, bu material yalnız məlumat xarakteri daşıyır və maliyyə məsləhəti hesab edilmir. İnvestisiya qərarları qəbul etməzdən əvvəl şəxsi maliyyə vəziyyətinizi qiymətləndirmək və peşəkar maliyyə məsləhətçisi ilə məsləhətləşmək tövsiyə olunur.

Tənzilə Ağabalayeva