Fövqəladə Hallar naziri Kəmaləddin Heydərovun oğlu Nicat Heydərov və SOCAR-ın Neft Kəmərləri İdarəsinin sabiq rəisi Rizvan Vahabova qarşı məhkəmə iddiası qaldırılıb.
Azia.az xəbər verir ki, Ali Məhkəmədə baxılan məhkəmə işində Mustafayev Sərdar Nurəddin oğlu iddiaçı, Heydərov Nicat Kəmaləddin oğlu, Vahabov Rizavan Əkbər oğlu, Vahabova Olqa Nikoloyevna, həmçinin 25 saylı Notariat Kontoru ilə Daşınmaz Əmlakın Dövlət Reyestri Xidmətinin 1 saylı Bakı şəhər Ərazi İdarəsi cavabdeh qismində iştirak edirlər.
Hakim İlqar Xələfovun sədrliyi ilə ilk iclas 14.09.2020-ci il tarixində keçirilib və növbəti iclas (Baxış iclası) isə 04.11.2020-ci il tarixində saat 15:45-ə keçiriləcək.
Məhkəmə çəkişməsi mülkiyyət hüquqi ilə bağlıdır. İddiaçı ona məxsus torpaq sahəsinin qanunsuz yolla əlindən alındığını iddia edir.
Məlumat üçün bildirək ki, Fövqəladə Hallar naziri Kəmaləddin Heydərovun 1986-cı ildə anadan olan kiçik oğlu Nicat Heydərov 22 yaşından etibarən Londonda şirkət rəhbəri olaraq fəaliyyət göstərib. Dövlət Sərhəd Xidmətinin rəisi, general Elçin Quliyevin qızı ilə evli olduğu bildirilən Nicat Heydərov Londonda rəhbərlik etdiyi şirkətlərin siyahısı aşağıdaki kimi olub:
1. “Cafe Baku limited” – (13 Oktyabr 2011 - 5 Fevral 2015).
2. “Uei Property (UK) Limited” – (22 Mart 2011 - 5 Fevral 2015).
3. “Uei Caspian Caviar Limited” - (26 Mart 2009 – 25 İyun 2013).
4. “Uei Cay Limited” - (26 Mart 2009 – 25 İyun 2013).
5. “Azerbaijan Carpets Limited” - (26 Mart 2009 – 25 İyun 2013).
6. “Azerbaijan German Consultancy Company Limited” – (26 Mart 2009 - 25 İyun 2013).
7. “Azerbaijan Juices Limited” – (26 Mart 2009 - 5 Fevral 2015).
8. “United Enterprises İnternational limited” – (6 Oktyabr 2008 - 5 Fevral 2015).
9. “The European Azerbaijan Society” - (8 İyul 2008 – 15 May 2013).
Yeni Azərbaycan Partiyası (YAP) Siyasi Şurasının üzvü olan Rizvan Əkbər oğlu Vahabov isə 1995-ci ildə Azərbaycan Respublikası Dövlət Yanacaq Komitəsi sədrinin birinci müavini təyin edilib. Daha sonra Dövlət Neft Şirkəti (SOCAR) Neft Kəmərləri İdarəsinin rəisi olub.