2001-ci ilin iyul ayında Ağsu rayonunun Cəlayır kəndində 1981-ci il təvəllüdlü Zeynalov Feyruz Ağaxan oğlunun müəmmalı şəkildə itkin düşməsi ilə bağlı araşdırmalar aparılır.

Publika.az-ın əldə etdiyi məlumata görə, bir neçə ay əvvəl bu hadisə aktuallaşandan sonra Ağsu rayon Polis Şöbəsində araşdırmalar aparılb. Araşdırmalar zamanı Cinayət Məcəlləsinin 125-ci (özünü öldürmə həddinə çatdırma) maddəsinin xüsusatlarına uyğun şübhələr yarandığından araşdırma materialları rayon prokurorluğuna göndərilib.

Qeyd edək ki, bir neçə ay əvvəl Ağsu rayon sakini olan yaşlı qadın oğluna şər atılması barədə məlumat yayıb.

Sosial şəbəkələrdə çıxış edən Ruhiyyə Zeynalova iddia edib ki, oğlu Feyruz Zeynalov 2001-ci ildə naməlum şəkildə yoxa çıxıb.

O bildirib ki, həmyerlisi Zərifə Əhmədova və onlara gələrək onun qızı və Feyruz Zeynalovun arasında yaxın münasibət olduğunu və buna görə də onların evlənməli olduğunu bildirib.

F.Zeynalov isə ona böhtan atıldığını və belə bir şeyin olmadığı deyib.

R.Zeynalova hadisə ilə bağlı polisdə məsələnin araşdırmadığını iddia edib.

Məsələ barədə Daxili İşlər Nazirliyi (DİN) məlumat yayıb.

DİN Mətbuat Xidmətinin Şəki regional qrupundan verilən məlumata görə, “oğluma şər atdılar ki, guya qıza sataşıb, indi oğlum neçə vaxtdır yoxa çıxıb” - Ağsudan şikayət” başlığı ilə yayımlanan görüntüdə əks olunan iddialar əsassızdır, həqiqəti əks etdirmir: " Ruhiyyə Zeynalovanın oğlu Feyruz Zeynalovun 2001-ci ildə itkin düşməsi ilə bağlı hüquq-mühafizə orqanlarına heç bir məlumat daxil olmayıb. Buna baxmayaraq, həmin iddiaların təfərrüatı Ağsu Rayon Polis Şöbəsi (RPŞ) tərəfindən araşdırılır.

Bu iddiaların ortaya çıxmasının kökündə mübahisə tərəflərindən birinin – Zərifə Əhmədovanın oğlu Səlaməddin Əhmədovun Mikayıl Zeynalova qarşı xüsusi ittiham qaydasında məhkəməyə müraciət etməsi dayanır".