Yaponiya Aerokosmik Tədqiqatlar Agentliyi (JAXA) yeni flaqman hidrogenlə işləyən H3 seriyalı raketini buraxılış yerindəki hava şəraiti ilə əlaqədar buraxmamaq qərarına gəlib.
Bu barədə Associated Press (AP) xəbər agentliyi məlumat yayıb.

Cihaz fevralın 15-də Yaponiyanın cənubundakı arxipelaqdakı Taneqaşima Kosmik Mərkəzindən buraxılmalı idi, lakin güclü küləklə müşayiət olunan gözlənilən tufan səbəbindən missiya dayandırılıb. Yeni cəhdin tarixi hələ açıqlanmayıb.

JAXA, ötən il mart ayında prototipin və onun ALOS-3 Qabaqcıl Uzaqdan Zondlama Peykinin özünü məhv etmə əmri ilə məhv edilməli olduğu fəlakətli debütdən sonra H3 raketinin sınağında müvəffəqiyyətə zəmanət vermək istəyir.

Mümkün nasazlığın nəticələrini minimuma endirmək üçün növbəti buraxılış zamanı H3 ALOS peykinin 2,6 tonluq maketi ilə təchiz olunacaq. Raket həmçinin Canon Electronics və Seiren tərəfindən inşa edilmiş iki funksional mikromüşahidə peykini daşıyacaq.

H3 raketləri əvvəlki nəsil H-2A-nı əvəz etməlidir. Yeni versiya JAXA tərəfindən sənaye nəhəngi "Mitsubishi Heavy Industries" ilə birlikdə hazırlanıb. Layihənin dəyəri təxminən 1,5 milyard dollar olub.