“Nazirliyə məlumat verdim, videogörüntülər paylaşdım, amma heç bir reaksiya verilmədi”

6 iyul 2021-ci il tarixində Ekologiya və Təbii Sərvətlər Nazirliyi (ETSN) Ekoloji Təhlükəsizlik Xidmətinin rəisi Hikmət Əlizadə Qusar bölgəsi ərazisində yerləşən Qalacıq meşəsinin məhv edilməsi ilə bağlı sosial şəbəkələrdə yayılan iddialara münasibət bildirdi. Dedi ki, sosial şəbəkələrdə yayılan xəritələr təhrif olunur.

“Bu məlumatlar “Google Earth” proqramından istifadə edərək Nazirliyin mütəxəssisləri tərəfindən araşdırıldı. Məlum olduğu kimi, 2019-2021-ci illərdə bu zonanın yaşıl sahələrində qismən azalma baş vermişdi, lakin onların tamamilə məhvi qeydə alınmadı. Peyk şəkillərindən də görünür ki, bu ərazilərdə 2018-2019-cu illərdə sıx bitki örtüyü olmayıb”, - deyə Əlizadə bildirdi.

Onun sözlərinə görə, ETSN ərazini “Google Earth” proqramı vasitəsilə geniş xəritələrlə müqayisə edib: “2018-2020-ci illərdə tamamilə fərqli bir panorama var idi. Kütləvi informasiya vasitələrində və sosial şəbəkələrdə təhrif olunmuş məlumatların yayılmasının səbəbini anlamırıq. 2020-ci ilin oktyabr ayında bu ərazilərdə kolların təmizlənməsi işləri dayandırıldı və son 10 ayda orada heç bir iş aparılmadı. İndi qoz ağaclarının əkilməsi davam edir. Bu vəziyyətdə 10 ay ərzində yaşıllığın həcmində kəskin azalma necə müşahidə edə bilərsiniz?”.

Xidmət rəisinin açıqlamalarına baxmayaraq, eko-fəal Raik Abdurəhimov AYNA-ya açıqlamasında deyib ki, Qalacıqdakı meşə tamamilə məhv edilib: “Bu meşədə üç yüz yaşında olan ağaclar var idi, onlar da məhv edilib”.

Həmsöhbətimiz Qusar bölgəsində meşələrin məhv edilməsi prosesinin çoxdan davam etdiyini söyləyib: “Bu barədə Ekologiya və Təbii Sərvətlər Nazirliyinə məlumat verdim. Nazirliyin əməkdaşları yalnız kolların məhv edildiyini bildirdilər. Sosial şəbəkələrdə məhv edilmiş ağacların videolarını paylaşdım. Ancaq Nazirlik eyni şəkildə bu qanunsuzluğa da reaksiya göstərmədi”.

Yeri gəlmişkən, ötən il də saytımızda Qusar bölgəsindəki ağacların kütləvi şəkildə kəsilməsindən bəhs edən yazı yayımlanmışdı. Lakin ETNS bu məqalədə göstərilən faktlara da heç bir şəkildə reaksiya göstərməmişdi.

İndi yenə Nazirliyin əməkdaşlarından R. Abdurəhimovun dediklərinə münasibət bildirmələrini istədik. Təəssüf ki, heç bir cavab ala bilmədik.

Müəllif: Rəşad Rüstəmov