Deputatlığa namizədlər arasında iki gəncin adı xüsusi diqqət çəkir. Reportyor.info-nun araşdırmasına görə, 113 saylı Şəki şəhər seçki dairəsində məmur balası ilə milyonçu oğlunun amansız mübarizəsi gözlənilir.

Belə ki, vaxtilə Almaniyada 554 mənzil almış Nasir Mustafazadənin oğlu Nicat Mustafazadənin 113 saylı Şəki şəhər seçki dairəsindən namizədliyi təsdiq olunub.

Nicat Mustafazadə “Kapital Bank” ASC-də aparıcı mütəxəssisdir, İngiltərənin Durham biznes məktəbinin məzunudur.

Atası Nasir Mustafazadə “Azəri Servis LTD”nin rəhbəridir, əvvəllər “Azərkəndsutəchizatı” Dövlət Konsernində çalışıb.

Onun sahib olduğu şirkət irihəcmli tenderlərin “qalibi” olub, əsas sifarişçiləri “Meliorasiya və Su Təsərrüfatı”ASC, Qaçqınların və Məcburi Köçkünlərin İşləri üzrə Dövlət Komitəsi, Məcburi Köçkünlərin Sosial İnkişaf Fondu olub.

Həmçinin, “Azərsu” ASC, Bakı şəhəri Mənzil Kommunal Departamenti və rayon icra hakimiyyətləridir. Bir neçə il əvvəl Almaniyanın Frankfurt şəhərində 554 mənzil aldığı və sonradan bütün mənzilləri türk işadamına 22 milyon 800 min avroya satdığı məlum olmuşdu.

İndi oğlu N.Mustafazadə Şəkidən deputatlığa iddialıdır. Oliqarx oğlunun şanslarının sırf maliyyə hesabına yüksək olduğunu söyləmək olar.

Lakin 113 saylı Şəki şəhər seçki dairəsindən YAP-ın namizədi İskəndərov Vüqar Yapon oğludur. Hazırda Şəki şəhər Gənclər və İdman İdarəsinin rəisi, YAP Şəki şəhər Təşkilatının sədr müavini olan V.İskəndərov idmançı kimi tanınır. Onun da deputatlıq şansı az deyil.

Bu dairədə oliqarx və Yapon oğlunun əsas rəqibi isə Şəkinin icra başçısının müavini Firon Əliyevin oğludur.

Firon Əliyevin 1988-ci il təvəllüdlü oğlu Toğrul Əliyevin namizədliyi 113 saylı Şəki şəhər seçki dairəsindən təsdiq olunub.

Toğrul Əliyev keçmiş vergilər naziri Fazil Məmmədova məxsus “SYNERGY GROUP” MMC-də kommersiya departamenti direktoru vəzifəsində çalışır.

Firon Əliyev 19 ildən bəridir ki, icra başçısının müavinidir, yerli idarə və müəssisələrin bir çoxunda onun adamları rəhbər vəzifələri tutur.

Bir neçə il qabaq başçı ilə müavini F.Əliyev arasında qalmaqal olduğu barədə KİV yazmışdı. Beləliklə, 113 saylı dairəni “ölüm dairəsi” adlandırmaq olar.

Çünki hər üç rəqib gəncdir, şansları bərabərdir və kinin qalib gələcəyini 9 fevral günü biləcəyik. Meydanda oliqarx, Yapon və Firon balaları var. Seçim şəkili seçicilərindir…