"AZVİRT” MMC-nin direktoru Kamil Əliyevin qardaşından ŞİKAYƏT VAR: Səbail rayon Məhkəməsindən qərarından Fikrət Məmmədova MÜRACİƏT EDİLDİ
Bakı şəhəri, Səbail rayonu, T.Əliyarbəyov küçəsi 3-də yerləşən qapı 4, qapı 5 və qapı 6 ünvanlarındakı qeyri-yaşayış sahəsinin icarəçilərinə obyektdən istifadə etməyə icazə verilmir.

Bununla əlaqədar icarəçi İsgəndərov Nahid Əfqan oğlu “AzPolitika.info” saytı vasitəsilə Ədliyyə naziri, Məhkəmə Hüquq Şurasının sədri Fikrət Məmmədova müraciət edib.

Nahid İsgəndərovun müraciətində bildirilir ki, əmlakın mülkiyyətçisi olduğunu iddia edən şəxslər onun icarəyə götürdüyü obyektdən istifadə etməsinə sözün əsl mənasında maneçilik törədirlər. Onun sözlərinə görə, müqaviləsinin olmasına və icarə haqlarını vaxtı-vaxtında ödəməsinə baxmayaraq, obyektdən istifadəsinə imkan verilmir.

Nahid İsgəndərov bildirir ki, o, 2020-ci il fevral ayında “AZVİRT” MMC-nin direktoru Kamil Əliyevin qardaşı Əliyev Elnur Əli oğlu ilə icarə müqaviləsi bağlayaraq, ona məxsus qeyri-yaşayış sahəsini aylıq 20.000 manata 2 illik icarəyə götürüb. Sonra 270.000 manata qədər pul xərcləyərək öz vəsaiti hesabına obyekti əsaslı təmir edib və hazır vəziyyətə gətirib.

“Bir müddət bundan əvvəl isə Elnur Əliyev həmin obyekti özü istifadə etmək istədiyini bildirərək, bizi oradan çıxarmaq istədi. Biz isə haqlı olaraq çəkdiyimiz təmir xərclərini və müqavilə müddəalarını əsas gətirdik. Lakin Elnur Əliyev davamlı olaraq obyektimizin iş fəaliyyətini pozmağa, müştəriləri narahat etməyə, işçi heyəti ilə problemlər yaratmağa və ən əsası hər gün davamlı olaraq obyektdən çıxmağımızı tələb etməyə başladı. Həmin bu hərəkətlər mütəmadi xarakter aldığından icarəçi kimi məhkəməyə müraciət etdik. Həmin işə hazırda Səbail rayon Məhkəməsində baxılmaqdadır” – deyə, müraciətdə bildirilir.

Nahid İsgəndərov daha sonra qeyd edir ki, may ayının 24-də hüquq ictimaiyyətində analoqu olmayan bir qərarla onun icarəyə götürdüyü obyektə girişi qadağan edilib: “Belə ki, iş üzrə yeni bir tərəf kimi Elnur Əliyevin qaynanası Lətifə Abdullayeva adlı şəxs prosesə qoşularaq, guya icarəçi kimi mənim illərdir ona icarə haqqı ödəmədiyimi deyib. Buna görə də, icarəçinin obyektdən çıxarılmasını tələb edib.

Daha sonra müvəqqəti təmin tədbiri barədə ərizə ilə məhkəməyə müraciət edərək, mənim və başqalarının həmin obyektdən istifadə etməsinə qadağa qoyulmasını tələb edib. Səbail rayon Məhkəməsibdə hakim Şahin Abdullayevin sədrliyi ilə keçirilən prosesdə əsassız qərarlar qəbul edilərək, ərizə təmin olunub. Hətta dərhal da icraya yönləndirib. Sözsüz ki, bu prosedurda “Bakı Hüquq Mərkəzi” MMC-nin və Elnur Əliyevin “şəxsi əlaqə” lərinin də öz rolu olub.


hakim Şahin Abdullayev



Bunun ardınca isə öz hüququmuzdan istifadə edərək həmin qərardan şikayət verdik. Bakı Apellyasiya Məhkəməsinin hakimi Namiq Cəfərovun 17.06.2022-ci il tarixli qərarı ilə əsassız Səbail rayon Məhkəməsi qərarları ləğv olundu. Buna baxmayaraq 25 günə yaxın müddət ərzində obyekt möhür altında bağlı saxlanıldı. Obyektin yenidən açılmağına sevinə bilməmiş daha bir qanunsuz qərarla rastlaşdıq.

Belə ki, bu dəfə obyekt ilə heç bir əlaqəsi və bağlılığı olmayan Elvin Qasımovu məhkəməyə verən Lətifə Abdullayeva və Elnur Əliyev 24.06.2022-ci il tarixli qərarın (hakim İlkin Rüstəmli) çıxarılmasına nail oldular. Həmin qərarda isə obyektdən istifadə Elvin Qasımova və “başqa” şəxslərə qadağan edilmişdir.


hakim İlkin Rüstəmli


Belə bir qərar hüquq cameəsində anoloqu olmayan bir hüquqi akt sayıla bilər. Belə ki, bu proseslə heç bir əlaqəsi olmayan bir vətəndaşa obyektdən istifadə qadağan edilir. Bu yolla obyektə dair icarə müqaviləsi bağlamış digər vətəndaşa müqavilə üzrə əldə etdiyi hüquqdan istifadə rəsmi icarəçidə qadağan edilir”.
Nahid İsgəndərovun sözlərinə görə, işin maraqlı tərəfi ondan ibarətdir ki, ona münasibətdə çıxarılmış tamamilə eyni məzmunlu qərarla Bakı Apellyasiya Məhkəməsi tərəfindən ləğv olunmuşdu.

“Başıma gətirilən hüquqa zidd müsibəti qısa olaraq izah etməli olsaq, bir qərarla mənə obyektdən istifadə qadağan edilir. Həmin qərarda Apellyasiya Məhkəməsində ləğv olunur. Daha sonra isə yeni bir qərarla guya şərik olan Elvin Qasımova və “başqa” şəxslərə, (yəni mənə də) obyektdən istifadə qadağan edilir.

Olduqca maraqlı və bir o qədər də absurd olan hazırki qərarlarla müqavilə bağlayaraq, icarə haqqı ödəyib obyektdən istifadə edən icarəçiyə obyektdən istifadə qadağan edilməkdədir. Hazırda isə obyektin qapısına möhür vurulmuş və bağlatdırılmışdır. Müraciətimə çıxarılmış məhkəmə qərarlarını da əlavə edirəm. Bir faktı da qeyd edim ki, yuxarı məhkəmə instansiyasının qərarı daha aşağı məhkəmə instansiyaları üçün məcburi xarakter daşıyır. Görünür, Səbail rayon Məhkəməsi qanunun tələbindən yayınmaq üçün anoloqu olmayan qeyri-hüquqi yol kəşf edib. Bir sözlə, iş üzrə əsl icarəçiyə qadağa tətbiq edilməsi mümkün olmadıqda, iş ilə hər hansı əlaqəsi olmayan bir şəxsi cavabdeh kimi cəlb edib qadağaları onun üzərindən tətbiq edirlər. Bu hüquqa zidd üsulu da Səbail rayon Məhkəməsi təmtəraqlı formada öz qərarları ilə təsdiq edir” – deyə, müraciətdə bildirilir.

Nahid İsgəndərov onu da qeyd edir ki, hazırda bir icarədar və sahibkar kimi onun konstitusion hüquqları pozulur: “İcarəsini ödədiyim obyektdən istifadə qadağan olunur. Həmçinin həmin obyektin 50-dən çox işçisi var. Obyektin bu qədər uzun müddət bağlı saxlanılması həmin işçilərin maddi təminatlarını da mümkünsüz edir. Elnur Əliyev bizə onların müdafiəçilərinin arxasının güclü olduğunu, bizim heç vaxt uğur qazana bilməyəcəyimizi ifadə edir.

Hörmətli Fikrət müəllim! Məhkəmə Hüquq Şurasının sədri kimi Sizlərə bu ədalətsizliyin qarşısını ala bilməyiniz ümidi ilə müraciət edirik. Ümid edirik, müraciətimizi nəzərə alacaqsınız”.

Müraciətlə bağlı qarşı tərəfin də mövqeyini dərc etdirməyə hazırıq.