Prezident İlham Əliyev tərəfindən 2016-cı ilin ölkəmizdə "Multikulturalizm ili" elan olunması ölkəmizdə azsaylı xalqların mədəniyyətinə, adət-ənənələrinə verilən qiymətin daha bir bariz nümunəsi oldu.
Bunu mədəniyyət və turizm naziri Əbülfəs Qarayev Beynəlxalq Abidələr və Tarixi Yerlər Günü münasibətilə Mədəniyyət və Turizm Nazirliyinin dəstəyi ilə "Atəşgah məbədi" Dövlət Tarix-Memarlıq Qoruğunda ölkəmizdə yaşayan milli azlıqlara həsr olunmuş festivalda deyib.
Nazir bildirib ki, ölkəmizdə yaşayan hər bir azsaylı xalqın sərvəti də bizim dövlətin sərvətidir.
Ə.Qarayev vurğulayıb ki, Prezident İlham Əliyevin diqqət və qayğısı sayəsində tarixi abidələrin qorunması, bərpası ilə bağlı ciddi işlər həyata keçirilir: "Bu gün Azərbaycan tarixinin dərindən öyrənilməsinə xüsusi diqqət yetirilir. Ölkə başçısının sərəncamı ilə yeni qoruqlar yaradılır, tarixi yerlər, abidələr aşkar olunaraq bərpa edilir. Azərbaycan xalqının mədəni dəyərlərinin qorunub saxlanılmasında və tanıdılmasında Heydər Əliyev Fondunun da böyük payı var. Fondun prezidenti, ölkəmizin birinci xanımı Mehriban Əliyeva tərəfindən Azərbaycan mədəniyyətinin dünyada tanıdılması üçün böyük işlər görülür".
Ə.Qarayev qeyd edib ki, hazırda Şəki şəhərində yerləşən tarixi abidlərin UNESCO-nun mədəni irs siyahısına salınması üçün müvafiq işlər həyata keçirilir. Növbəti illərdə isə Naxçıvan şəhərində yerləşən tarixi və memarlıq abidələrinin bu siyahıya salınması üçün addımlar atılacaq.