Milyonluq auditoriyası olan amerikalı iş adamı və bloqer Əli Sobh izləyicilərinin köməyi ilə oğurlanmış açıq yaşıl rəngli "McLaren 750S" avtomobilini geri qaytarıb. Superkar onun evinin qarşısındakı giriş yolundan oğurlanmışdı.

Oxu.Az xəbər verir ki, bu barədə "Road & Track" nəşri məlumat yayıb.

Bir müddət sonra Sobh internetdə avtomobilinin "drift" etdiyi görüntülərə rast gəlib. Ətrafdakı şəxslər manevrləri telefonla lentə alıblar. Bloqer avtomobilin axtarışında izləyicilərindən kömək istəyib. Onlardan gələn məlumatlar avtomobilin "Six Mile Road" və "Telegraph Road" yollarının kəsişdiyi ərazidə ola biləcəyini göstərib. Sobh bu məlumatı dərhal Detroyt polisinə çatdırıb. Avtomobil qısa müddətdə tapılıb.

Hazırda polis görüntüləri araşdırır və avtomobili oğurlayan şəxslərin kimliyini müəyyənləşdirməyə çalışır. Görüntülərdə "drift" edən sürücünün oğurluqda iştirak edib-etmədiyi hələlik məlum deyil.

Sobh avtomobilinin dəyərinin təxminən 500 min dollar olduğunu bildirib. O, hadisənin təkrarlanmaması üçün evinin mühafizəsini gücləndirmək niyyətindədir. İş adamı superkarın tapılmasına kömək edən izləyicilərinə təşəkkür edib.