Avqustun əvvəlindən Rusiya rublu əsas dünya valyutalarına qarşı möhkəmlənməkdədir.

Belə ki, ABŞ dollarına qarşı 60-60,7 rubl dəhlizi göstərdi ki, bu, tələb və təklifin müvəqqəti balansı, xüsusən də ixracatçılardan valyuta təklifinin azalması ilə əlaqəlidir.

Azia.az Rusiya mətbuatına istinadən xəbər verir ki, nəticədə volatillikdə azalma müşahidə olunub və müəyyən edilmiş hüdudlardan kənara çıxmaq üçün bütün cəhdlər uğursuz alınıb. Bu barədə "PRIME" agentliyinə müsahibəsində "Banki.ru" maliyyə supermarketinin baş analitiki Boqdan Zvariç məlumat verib. O hesab edir ki, yaxın gələcəkdə sabitləşmə istiqamətli hərəkətlə əvəz oluna bilər.

Ekspert hesab edir ki, bu dinamika üçün siqnal mövcud diapazondan çıxış ola bilər və sərhədlərdən birinin pozulması sonrakı hərəkət istiqamətini göstərə bilər.

"Belə ki, məzənnə 60,7 rubldan yuxarı qalxacağı təqdirdə, dollar/rubl qarşılığı 62-64 rubl bölgəsində təcili hədəflərlə artıma keçməyə çalışacaq ki, bu da xarici valyuta təklifinin artması ilə məhdudlaşdırılacaq",-Zvariç deyib.

Eyni zamanda, o vurğulayıb ki, Amerika valyutasının məzənnəsinin 60 rubldan aşağı olması 55 rubldan bir qədər aşağı müəyyən edilmiş iyul minimumlarına geri çəkilmək lehinə olacaq.

“Fundamental komponent də hadisələrin bu inkişafına müsbət təsir göstərir, yaxın gələcəkdə ixracatçılar pik dövrü avqustun 25-ə təsadüf edən vergi ödənişləri üçün hazırlıqlara başlayacaqlar. Bu, bazarda xarici valyuta təklifinin artmasına gətirib çıxaracaq və rublu dəstəkləyəcək”, - Zvariç əminliklə bildirib. Onun sözlərinə görə, milli valyutaya əlavə dəstək enerji bazarının neftin bir barelinin qiymətinin 100 dollardan yuxarı olmasına qayıtması ola bilər. "Eyni zamanda ABŞ valyutası üçün ən yaxın dəstək 58,5 rubl olacaq",-o əlavə edib. Analitik proqnozlaşdırır ki, rublun möhkəmlənməsinin bu ssenarisi reallaşarsa, dollar kəskin şəkildə ucuzlaşacaq.

“İnvestorlar güman edirlər ki, qarşıdakı ayların üfüqündə idxalın bərpası və ixracdan gələn valyuta gəlirlərinin azalması nəticəsində xarici valyutaya tələb və təklifin sabit balansı formalaşa bilər. Ortamüddətli perspektivdə bu, rublun zəifləməsinə kömək edəcək, nəticədə dollar/rubl məzənnəsinin 55 rubl civarına getməsi iddiaçılar tərəfindən dolları daha cəlbedici qiymətlərlə almaq imkanı kimi qəbul edilə bilər”,- ekspert fikrini yekunlaşdırıb.

Onu da əlavə edirik ki, Moskva birjasında dünənki hərracların yekunlarına əsasən, rublun məzənnəsi neftin qiymətinin artımı ilə dəstəklənərək dollar qarşısında dəyişməyib və avroya nisbətdə bahalaşıb. Belə ki, Moskva vaxtı ilə saat 19:00-da (bağlanmağa yaxın) ABŞ valyutasının məzənnəsi “sabah” hesablamaları ilə əvvəlki ticarət bağlanışı səviyyəsində 60,67 rubl səviyyəsində qalıb, avro isə 14 qəpik ucuzlaşıb, yəni 62,61 rubla qədər aşağı düşüb.