Paytaxtın Səbail rayonu ərazisində yaşayan və yaşadığı evin pəncərəsindən yıxılaraq aldığı xəsarətlərdən xəstəxanada ölən Aytən Niftəliyevanın ailəsi ölüm faktı ilə bağlı aparılan istintaq prosesindən narazıdır, - bunu mərhum Aytən Niftalıyevanın qardaşı İlkin Süleymanov Azia.az-a müsahibəsində söyləyib.

"İstinaq prosesi çox yavaş gedir. Aytən rəhmətə gedənə qədər ekspertiza aparılmadı. Məndə olan məlumata görə, gedib hadisə yerindən detalların toplanıb araşdırılması ilə bağlı məşğul olmayıblar. İstintaqın bu cür gedişatından razı deyilik. Qarşı tərəfin adamı var bilmirəm, amma prosesi çox ləngidirlər. Biz ictimailəşdirməsəydik məsələyə baxılmayacaqdı. Ortada bu boyda cinayət işi var. Ən azı cinayət məcəlləsinin "özünü öldürmə həddinə çatdırma"nı nəzərdə tutan 125-ci maddəsi ilə iş açılması çox azdır. Qadına zorakılıq edib, döyüb. Narazılığımızı vəkilimiz vasitəsilə prokurorluğa bildirmişik. Ölkə prezindetinə, birinci xanıma və 10 yerə şikayət məktubu göndərmişik. Bu işin dəqiq araşdırılmasını və qatillərin həbs olunmasını istəyirik", - deyə ölən qadının qardaşı bildirib.

Paytaxtın Səbail rayonu ərazisində yaşayan Aytən Niftəliyeva və azyaşlı övladı Tahirə Niftəliyeva avqustun 30-da yaşadıqları evin pəncərəsindən yıxılaraq xəstəxanaya çatdırılıb və orada vəfat edibllər.

Göstərilən zəruri tibbi yardımlara baxmayaraq, Tahirə Niftəliyeva aldığı xəsarətlərdən avqustun 30-da, Aytən Niftəliyeva isə sentyabrın 2-də müalicə olunduqları xəstəxanada vəfat ediblər.

Faktı ilə bağlı Səbail rayon prokurorluğunda Cinayət Məcəlləsinin 125-ci (özünü öldürmə həddinə çatdırma) maddəsi ilə cinayət işi açılıb.

Aytən Niftəliyevanın ailəsi hadisəni intihar yox, qətl kimi qiymətləndirir və bunda onun həyat yoldaşı Rəhman Niftəliyevi ittiham edir. A.Niftəliyevanın anası Mehriban Süleymanova kürəkəninin qızını mütəmadi döydüyünü və ölümünə səbəb olduğunu bildirib.

Amma Aytən Niftəliyeva və 1 yaşlı qızı Tahirənin ölümünə səbəb olduğu iddia olunan qadının həyat yoldaşı Rəhman Niftəliyev sosial şəbəkə hesabında açıqlama verərək bildirib ki, onun haqqında səsləndirilən iddialar yalandır.