Payız aylarında süfrələrin sevilən yeməklərindən olan balqabaq sıyığını qədim reseptlə hazırlamaq mümkündür. Ukrayna mətbəxinə aid bu üsulda balqabaq darı yarması və ya düyü ilə bişirilir, süd və kərə yağı isə yeməyə xüsusi dad verir.

Xəbər verilir ki, bu barədə UNIAN nəşri yazıb.

Sıyığın dadlı alınması üçün ilk növbədə balqabağın düzgün bişirilməsi vacibdir. Tərəvəz qabıq və toxumlardan təmizlənir, 2-3 santimetrlik tikələrə doğranır. Daha sonra qalın dibli qazana yığılır, üzərinə parçaların yarısına qədər su əlavə edilir və qapağı örtülərək zəif odda təxminən 10 dəqiqə bişirilir.

Bundan sonra yuyulmuş darı və ya düyü balqabağa əlavə olunur və qarışıq daha 20 dəqiqə bişirilir. Sıyığın konsistensiyasını yaxşılaşdırmaq üçün bişmiş balqabaq mayesi ilə birlikdə əzilir. Zövqə görə şəkər, süd və kərə yağı da əlavə edilə bilər.

1960-cı ilin resepti

UNIAN-ın məlumatına görə, resept 1960-cı ildə nəşr olunan "Ukrayna yeməkləri" kitabından götürülüb. Ənənəvi variantda əsasən darıdan istifadə edilir, lakin onu düyü ilə də əvəzləmək mümkündür.

Lazım olan ərzaqlar:

- 1 kq balqabaq;
- 200 qram darı yarması və ya təxminən dörddə üç stəkan;
- 1,5 xörək qaşığı şəkər;
- bir çimdik duz;
- 1,5 stəkan süd;
- 2 xörək qaşığı kərə yağı.

Hazırlanma qaydası

Balqabaq təmizlənərək kiçik kub şəklində doğranır və süd əlavə olunmuş qazanda təxminən 10 dəqiqə bişirilir. Yumşalmış balqabaq südü ilə birlikdə ələkdən keçirilir, yaxud blender və ya əzici vasitəsilə püre halına gətirilir.

Qarışıq yenidən qazana tökülür, yuyulmuş darı, şəkər və duz əlavə edilir. Yarma tam bişənədək təxminən 20 dəqiqə qaynadılır. Hazır sıyıq süfrəyə kərə yağı ilə verilir. Daha zəngin ətir əldə etmək üçün üzərinə bir qədər üyüdülmüş darçın səpmək də olar.

Mütəxəssislərin tövsiyəsinə görə, sıyıq üçün şirin və ətirli ətli muskat balqabağı növləri, o cümlədən "Butternut" daha uyğun seçimdir. Kiçik ölçülü balqabaqlar da adətən daha şirin olur.

Jalə