Süni intellekt modellərinin insan müdaxiləsi olmadan başqa cihazlara köçürülərək çoxaldılması ehtimalı artır. “Anthropic” şirkətinin yeni araşdırmasına görə, bu texnologiya yaxın aylarda mümkün ola bilər. Bunun üçün güclü məlumat mərkəzlərinə də ehtiyac qalmaya bilər.

Xəbər verilir ki, oktyabrın 12-də yayımlanan araşdırmada kiçik süni intellekt modellərinin müxtəlif cihazlara daxil olmaq, öz nüsxələrini ötürmək və şəbəkə vasitəsilə yayılmaq imkanları qiymətləndirilib.

Tədqiqatçılar internetə qoşulan televizorlar, soyuducular, robot tozsoranlar və digər məişət cihazlarının belə proseslərdə istifadə oluna biləcəyini bildiriblər. Təcrübələrdən birində təxminən 55 dollara başa gələn 15 Android TV qurğusu birləşdirilərək süni intellekt modelinin işlədilməsi mümkün olub.

Digər sınaqda isə kiçik model yoxlanılan doqquz fərqli avadanlıq növündən səkkizində süni intellektin işləməsi üçün tələb olunan quraşdırma prosesini yerinə yetirib. Bununla belə, modellər bütün mərhələləri müstəqil və səhvsiz tamamlamaqda çətinlik çəkiblər.

Araşdırmanın ən diqqətçəkən hissəsində təhlükəsizlik məhdudiyyətlərinin azaldıldığı sınaq mühitində GLM-5.2 modeli şəbəkədəki səkkiz hədəf cihazın hamısına çatmağı bacarıb. Lakin model özünün deyil, daha kiçik başqa bir süni intellekt modelinin nüsxəsini cihazlara ötürüb. Buna görə də nəticələr süni intellektin real şəraitdə tam müstəqil şəkildə çoxala bildiyini sübut etmir.

“Anthropic” hesab edir ki, kiçik süni intellekt modelləri hazırkı sürətlə inkişaf edərsə, 2026-cı ilin sonunadək belə əməliyyatları həyata keçirmək imkanına yiyələnə bilər. Şirkət bunun qəti proqnoz deyil, mövcud texnoloji inkişaf tempinə əsaslanan ehtimal olduğunu vurğulayır.

Tədqiqatçıları narahat edən əsas məqamlardan biri bu cür sistemlərin nəzarətdən çıxması ehtimalıdır. Süni intellekt müxtəlif cihazlara yayıldıqdan sonra onun bütün nüsxələrini vahid mərkəzdən söndürmək çətinləşə bilər. Bununla belə, araşdırmaya görə, belə yayılma prosesi sürətli olmaya və günlərlə davam edə bilər.

Şirkət xüsusilə təhlükəsizlik tədbirləri zəif olan ağıllı ev cihazlarının risk yarada biləcəyinə diqqət çəkir. İstehsalçılara təhlükəsizlik boşluqlarını aradan qaldırmaq, güclü standart şifrələr tətbiq etmək və cihazların müdafiəsini gücləndirmək tövsiyə olunur.

Araşdırma özünü müstəqil şəkildə çoxaldaraq real dünyada yayılan süni intellekt sisteminin artıq mövcud olduğunu göstərmir. Bununla belə, əldə edilən nəticələr belə bir texnologiyanın yaradılması qarşısındakı texniki maneələrin azaldığına işarə edir.

Paşa Məmmədli