Kəsmik və yumurta zülalla zəngin qidalar arasında xüsusi yer tutur. Bəs daha çox protein əldə etmək istəyənlər üçün hansı məhsul daha yaxşı seçimdir?

Demokrat.az "Health"a istinadən xəbər verir ki, diyetoloq Cillian Kubala bu iki məhsulu qida dəyəri baxımından müqayisə edib.

Yumurtada daha çox protein var

ABŞ Kənd Təsərrüfatı Departamentinin məlumatlarına əsasən, 100 qram yumurtada təxminən 13,6 qram protein var. Eyni miqdarda 2 faiz yağlı kəsmikdə isə 10,4 qram protein olur.

Bununla belə, mütəxəssis hər iki məhsulun yüksək keyfiyyətli və tam zülal mənbəyi olduğunu vurğulayıb. Onların tərkibində orqanizm üçün vacib olan doqquz əvəzolunmaz amin turşusunun hamısı mövcuddur.

Yumurtanın başqa üstünlükləri

Yumurta proteinlə yanaşı, xolin, A və B12 vitaminləri, selen və sink baxımından da zəngindir. Tərkibindəki lutein və zeaksantin isə göz sağlamlığının qorunmasına kömək edən antioksidantlar hesab olunur.

Kəsmik isə daha az kalori və xolesterin ehtiva edə bilər və kalsium baxımından yaxşı mənbədir. Bu mineral sümüklərin sağlamlığı üçün vacibdir. Kəsmiyin bəzi növlərində bağırsaq mikrobiotasına faydalı bakteriyalar da ola bilər.

Hansını seçmək lazımdır?

Əgər əsas məqsəd rasiondakı protein miqdarını artırmaqdırsa, yumurta daha üstün seçimdir. Lakin kəsmik də sağlam və zülalla zəngin qida olaraq rasionda yer ala bilər.

Dietoloqun fikrincə, xüsusi qida məhdudiyyəti və ya allergiya yoxdursa, bu iki məhsuldan yalnız birini seçmək məcburiyyətində deyilsiniz. Həm yumurta, həm də kəsmik balanslı qidalanmanın faydalı hissəsi ola bilər.

Jalə