Bir zarafat bəzən milyonlarla dollar qazandıra bilər. ABŞ-li reklamçı Qeri Ros Dal dostları ilə söhbət zamanı söylədiyi bir fikri qısa müddətdə dünyanın ən məşhur hədiyyələrindən birinə çevirdi. O, adi daşı "ev heyvanı" kimi sataraq cəmi 6 ay ərzində milyonçu oldu və marketinq tarixinin ən uğurlu kampaniyalarından birinə imza atdı.

Sadə zarafat biznes ideyasına çevrildi

Valyuta.az xəbər verir ki, Qeri Ros Dal 1936-cı ildə ABŞ-ın Şimali Dakota ştatında anadan olub. Uşaqlıq illərini Vaşinqton ştatında keçirən Dal universitet təhsilini başa vurduqdan sonra Kaliforniyaya köçərək reklam sahəsində kopirayter və kreativ direktor kimi fəaliyyət göstərməyə başlayıb.

Onun həyatını dəyişən ideya isə 1975-ci ilin aprelində dostları ilə Kaliforniyanın Los Gatos şəhərindəki bir barda etdiyi söhbət zamanı yarandı. Dostları ev heyvanı saxlamağın çətinliklərindən, yəni yemək verməkdən, gəzdirməkdən, baytar xərclərindən şikayətlənərkən Dal zarafatla "ən yaxşı ev heyvanım daşdır, ona qulluq lazım deyil" dedi.

Bu zarafat onun beynində biznes ideyasına çevrildi. O, adi çay daşlarını xüsusi qutulara yerləşdirərək "Pet Rock" ("Ev heyvanı daşı") adı altında satmağa qərar verdi.

Adi daşı xüsusi məhsula çevirdi

Qeri Ros Dal Meksikadan hamar çay daşları gətirdi, onlar üçün hava dəlikləri olan xüsusi karton qutular hazırlatdı və qutunun içinə saman yerləşdirdi. Bununla yanaşı, alıcılara daşlarını necə "öyrətmək" barədə yumor dolu istifadə təlimatı da əlavə etdi. Təlimatda daşa "otur", "qal", "yuvarlan" kimi əmrlərin necə "öyrədilməsi" zarafatla izah olunurdu.

1975-ci ilin avqustunda məhsul ilk dəfə San-Fransiskoda keçirilən sərgidə təqdim edildi.

6 aydan da az müddətdə milyonçu oldu

Həmin dövrdə ABŞ-da Vyetnam müharibəsinin yaratdığı gərginlik və "Watergate" qalmaqalının təsiri davam edirdi. İnsanlar gündəlik mənfi xəbərlərdən yorulmuşdu.

Məhz belə bir dövrdə "Pet Rock" insanlara gülmək üçün sadə bir səbəb verdi.

Məhsul qısa müddətdə "Time", "Newsweek" və "People" kimi nüfuzlu jurnallarda işıqlandırıldı. Qeri Dal məşhur televiziya proqramlarına dəvət olundu və "Pet Rock" ölkə üzrə fenomenə çevrildi.

Yeni il mövsümündə gündə təxminən 100 min ədəd "Pet Rock" satılırdı. Hər daşın hazırlanması təxminən 1 dollara başa gəlirdi, satış qiyməti isə 3,95 dollar idi.

Nəticədə ümumilikdə təxminən 1,5 milyon ədəd məhsul satıldı və Dal altı aydan da az müddətdə milyonçu oldu.

Populyarlıq qısa sürdü

Lakin bu uğur uzunömürlü olmadı. 1976-cı ilin əvvəlindən etibarən alıcı marağı sürətlə azalmağa başladı. Satılmayan məhsulların bir hissəsi aztəminatlı uşaqlara bağışlandı. Daha sonra iki investor mənfəətdən pay tələb edərək ona qarşı məhkəmə iddiası qaldırdı və məsələ böyük məbləğdə razılaşma ilə həll olundu.

Qeri Dal sonradan “Canned Earthquakes,” “Sand Breeding Kits” kimi başqa maraqlı məhsullar hazırlasa da, onların heç biri "Pet Rock" qədər uğur qazanmadı. O, daha sonra reklam agentliyi yaradaraq televiziya, radio və internet layihələri üçün reklamlar hazırlamağa başladı.

2001-ci ildə isə reklam sahəsində təcrübəsini bölüşdüyü "Advertising for Dummies" kitabını nəşr etdirdi.

Bir zarafatın yaratdığı əbədi miras

Qeri Dal ömrünün sonuna qədər minlərlə ixtiraçıdan biznes məsləhəti almaq üçün müraciətlər qəbul edib. Sonralar verdiyi müsahibələrdən birində isə bəzən, "Pet Rock"u yaratmasaydı, həyatı daha sadə olardı deyə düşündüyünü etiraf edib.

Qeri Dal 2015-ci ildə vəfat etsə də, onun yaratdığı "Pet Rock" bu gün də marketinq dərslərində uğurlu brendinq nümunəsi kimi öyrədilir. Adi bir daşı milyonlarla insanın almasına razı salan bu ideya göstərir ki, bəzən böyük biznes mürəkkəb texnologiyadan deyil, doğru zamanlama, yaradıcı düşüncə və güclü marketinqdən başlayır.

Rəfiqə Abdin