Bakının Sabunçu rayonu, Maştağa qəsəbəsində yerləşən 7 saylı Şəhər Poliklinikasında vaksinasiya prosesi zamanı karantin qaydalarının pozulması ilə bağlı görüntülər sosial şəbəkələrdə yayılıb.

Görüntülərdən aydın olur ki, yüzə yaxın vətəndaş vaksin növbəsini gözləyir. Peyvənd olunmaq üçün gələnlər arasında sosial məsafə qorunmur, karantin qaydaları pozulur.

Bir neçə gün öncə Baş Prokurorluq və Daxili İşlər Nazirliyi Maştağa qəsəbəsində yerləşən 7 saylı Birləşmiş Şəhər Xəstəxanasında saxta COVID-19 pasportunun verilməsi ilə bağlı əməliyyat keçirib. Nəticədə sözügedən xəstəxanada 50-100 manat müqabilində vətəndaşlara saxta COVID-19 sertifikatı verən tibb bacıları saxlanılıb.