Dövlət Təhlükəsizliyi Xidmətinin rəisi, general-polkovnik Əli Nağıyevin Türkdilli Dövlətlərin Xüsusi Xidmət Orqanları Konfransının Qırğızıstanda keçirilən XXIV iclasında dediyi sözlər Ermənistanda revanşist qüvvələri narahat edib.

Azərbaycan kəşfiyyatının şefi çıxışında Ermənistandakı revanşistlərə xəbərdarlıq mesajı ünvanlayıb.

Bəzi qonşu ölkələrin ərazisindən bir sıra radikal dairələrin regionda və Azərbaycan daxilində mövcud olan sabitliyin və əmin-amanlığın pozulmasına yönəlmiş fəaliyyətinin mütəmadi davam etdirildiyini, həmçinin Ermənistandakı revanşist qüvvələrin təxribat niyyətlərindən hələ də əl çəkməməsi və bu ölkənin müxalifətinin Azərbaycan-Ermənistan münasibətlərinin normallaşdırılması prosesinə xələl gətirilməsi üçün ciddi-cəhdlə çalışmasının dərin təəssüf hissi yaratdığını nəzərə çatdırıb. Bəyan edib ki, Azərbaycanın xüsusi xidmət orqanları tərəfindən daim ayıq-sayıqlıq qorunmaqla hər cür neqativ halların qarşısı qətiyyətlə alınacaq.

DTX sədri bu çıxışı ilə qonşu ölkələrdəki radikal dairələrə və Ermənistandakı revanşist qüvvələrə açıq mesaj verir:

- Azərbaycan xüsusi xidmət orqanları baş verənlər haqda məlumatlıdır;
- Azərbaycana qarşı istənilən cəhdin qarşısı allnacaq;
- 44 günlük müharibədən sonra yaranmış yeni reallığı Ermənistandakı revanşistlər də, regiondakı bütün qüvvələr də qəbul etməlidir;

Ermənistanda keçmiş hakimiyyətə - revanşist qüvvələrə yaxınlığı ilə seçilən “MTN-nin ehtiyatda olan zabitlət birliyi” bəyanat yayıb və iddia edib ki, Azərbaycan kəşfiyyatının şefi erməni müxalifətinə nəzarət edir. Təşkilat Azərbaycan xüsusi xidmət orqanlarının Ermənistanın daxili proseslərində müdaxilə etdiyi iddiasını da irəli sürüb və buna görə Paşinyan hakimiyyətini günahlandırıb.

Ermənistandakı revanşist qüvvələrin bu iddiası daha çox Paşinyan hakimiyyətini ittiham hədəfinə çevirməyə hesablanıb. Lakin bəyanat həm də revanşist qüvvələrin Azərbaycan kəşfiyyatından ciddi şəkildə qorxuduğunu təsdiqləyir.