"E" vitamini yağda həll olan, orqanizmin sağlam fəaliyyəti üçün vacib olan güclü antioksidantdır.

Pravda.az bildirir ki, hüceyrə membranlarını sərbəst radikalların zərərli təsirindən qoruyur, immunitet sistemini gücləndirir, dərini qoruyur və yaşlanma prosesini ləngidir.

E vitamininin faydaları nələrdir?

– Hüceyrələri oksidləşmədən qoruyaraq xərçəng və ürək-damar xəstəlikləri riskini azaldır.
– İmmuniteti gücləndirir, infeksiyalara qarşı müqaviməti artırır.
– Dərini nəmləndirir, yeniləyir və günəş şüalarına qarşı qoruyur.
– Göz sağlamlığını dəstəkləyir, katarakt və yaşla bağlı görmə pozuntularının qarşısını alır.
– Hüceyrə və DNT-nin qorunmasına kömək edir.

E vitamini çatışmazlığı hansı fəsadlara yol aça bilər?

– Sinir sistemi pozğunluğu, koordinasiya və refleks problemləri;
– Əzələ zəifliyi, ağrılar və əzələ əriyib itməsi (atrofiya);
– İmmunitetin zəifləməsi, tez-tez xəstələnmə;
– Görmə zəifliyi, bulanıqlıq və gecə korluğu.
 

E vitamininin çoxluğu təhlükəlidirmi?

Bəli, əlavə şəkildə çox qəbul edildikdə daxili qanama, baş ağrısı, ürəkbulanma, dəri səpgiləri kimi fəsadlara səbəb ola bilər. Xüsusilə qan durulaşdırıcı dərmanlarla birgə istifadədə ehtiyatlı olunmalıdır.

Gündəlik ehtiyac necə ödənilir?

Böyüklər üçün gündəlik təklif olunan miqdar 15 mq-dır. Bunu günəbaxan tumu, badam, fındıq, ispanaq, avokado, zeytun yağı kimi qidalarla qarşılamaq mümkündür.

E vitamini hansı hallarda vacibdir?
 

– Yaşlılarda immunitet zəiflədikdə;
– Dəri və göz problemləri zamanı;
– İltihabi proseslərin qarşısını almaq üçün;
– Sinir və əzələ zəifliyində əlavə dəstək kimi.

Qeyd: E vitamini sağlam orqanizm üçün əvəzolunmazdır, lakin həm çatışmazlığı, həm də artıqlığı ciddi fəsadlara yol aça bilər. Qida vasitəsilə təbii şəkildə qəbul olunması tövsiyə edilir.


Əminə Bayramova