“Bir neçə saniyə ərzində 400-dən çox mənzilin satışı həyata keçirilə bilməz. Prosedurlar da doğru deyil. Ümumiyyətlə, hərdən müşahidə edirik, tender keçirirlər, başqa dövlətlərdə günlərlə, aylarla davam edən tender bizdə bir neçə saniyədə baş tutur. Əvvəldən məlum olur ki, tenderdə kim qalib elan olunacaq. Belə çıxır ki, Mənzil İnşaatı Dövlət Agentliyində əvvəlcədən siyahı var imiş, tez-bazar həll ediblər”. Bunu Pravda.az-a açıqlamasında Milli Məclisin deputatı Tahir Kərimli bildirib.

T.Kərimli qeyd edib ki, qeyd etdikləri sosial şəbəkələrdə yazılanlardan gəldiyi qənaətdir: “Buna şübhə ilə yanaşmaqda haqlıyıq. Biabırçılıqdır, bəsdir, insanları incitdilər... Mənə çox pis təsir edir, insanlarla doğru rəftar etmək lazımdır. Baxın, Afrika ölkələrində razılığa gəlinib ki, məmurların maaşları azaldılsın. Beləliklə, 400 milyon dollar qənaət ediblər. Bizdə isə əksinədir, məmurlar özlərinə hər cür şərait yaradırlar. İnsaları incitmək olmaz, mənzilə ehtiyacı olanlar var. Bu cür proseslər şəffaf həyata keçirilməlidir. Məmurlar deyir ki, xalq bizə niyə şübhə ilə yanaşır... Belə edirik ki, insanlar da narazı qalır, şübhələnir. MİDA-nın mənzil bölgüsü ciddi şübhələr yaradıb. Qaydalar da dəyişməlidir. Kim elektron ərizəni tez doldura bilirsə, düyməni tez basa bilirsə, irəli düşür, mənzil sahibi olur... Bəs daha çox ehtiyacı olanlar nə etsinlər? Sosial ədalət harada oldu? Belə mənzil paylamaq olmaz. Burada əsas prinsip daha çox ehtiyacı olanların müəyyən edilməsidir”.

Məsələ sosial şəbəkələrdə ciddi müzakirə predmetinə çevrilib. Bildirilib ki, 4 saniyə ərzində 500-ə yaxın mənzil satılıb.

Qeyd: Mənzil İnşaatı Dövlət Agentliyinin növbəti layihəsi – Yasamal Yaşayış Kompleksinin ikinci mərhələsinin 4 saylı binası üzrə 64, 6 saylı binası üzrə 44, 18 saylı binası üzrə 44, 21 saylı binası üzrə 44, 22 saylı binası üzrə 39, 23 saylı binası üzrə 39, 24 saylı binası üzrə 24, 25 saylı binası üzrə 72 və 26 saylı binası üzrə 72 mənzilin, ümumilikdə 442 mənzilin ipoteka kreditindən istifadə etməklə, həm də öz vəsaiti hesabına ödəniş üsulu ilə güzəştlə satışı prosesinə 30.03.2022-ci il tarixində saat 11:00-da başlanılmış və mənzillərin seçimi qısa müddətdə uğurla başa çatdırılıb.

Azərbaycan Respublikası Prezidentinin 24.05.2017-ci il tarixli 1418 nömrəli Fərmanı ilə təsdiq edilmiş Əsasnaməyə uyğun olaraq satışa çıxarılan 442 mənzilin seçimi “Elektron hökumət” portalı (www.e-gov.az) üzərindən “Güzəştli mənzil” elektron sistemi vasitəsilə bərabər şəraitdə etibarlı, təhlükəsiz, şəffaf və fasiləsiz iş rejimində həyata keçirilmişdir. “Güzəştli mənzil” sistemində elektron kabinet əldə etmiş şəxslərin sayı 24 761 nəfərdir.

Bugünkü satış zamanı 442 mənzilin seçimində iştirak edənlərin sayı 8 939 nəfər olmuşdur. Bu saata olan məlumata görə seçilmiş 442 mənzilin 257-i vətəndaşlar tərəfindən uğurla imzalanaraq ərizələri təqdim edilib.

Mənzillərin seçimi prosesi Mənzil İnşaatı Dövlət Agentliyinin inzibati binasında xüsusi karantin rejimi qaydalarına uyğun olaraq yaradılmış operativ qərargahda Azərbaycan Respublikasının Xüsusi Rabitə və İnformasiya Təhlükəsizliyi Dövlət Xidmətinin, Rəqəmsal İnkişaf və Nəqliyyat Nazirliyinin nümayəndələrinin iştirakı ilə müşahidə edilmişdir.

“Azərbaycan Respublikasının Mənzil İnşaatı Dövlət Agentliyinin sərəncamında olan mənzilləri vətəndaşların güzəştlə əldə etməsi Qaydası”na uyğun olaraq gözləmə qaydasında mənzillərin seçimi isə 04 aprel 2022-ci il tarixində saat 11:00-da başlayacaq və 08 aprel 2022-ci il tarixi saat 11:00-dək davam edəcəkdir.

Qaydaya əsasən satış müddətində seçilmiş bir mənzil həmin elan çərçivəsində daha iki şəxs tərəfindən də ardıcıl olaraq gözləmə qaydasında seçilə bilər. Bunun üçün, istifadəçi müəyyən edilmiş müddət ərzində “Güzəştli mənzil” sistemində elektron kabinetində müvafiq bölməyə daxil olaraq ödəniş üsulu, mənzil seçimi üsulu və layihəni seçərək mənzili axtarır. Mənzilə baxış mərhələsində bir neçə istifadəçi eyni mənzilə baxış keçirə bilər və “Təsdiq et” düyməsini sıxan ilk 2 şəxs həmin mənzili gözləmə qaydasında seçə bilər. Daha sonra istifadəçi gözləmə qaydasında seçdiyi mənzilin ərizəsini imzalayıb təqdim etməlidir. Əgər hər hansı bir səbəbdən mənzil onu seçmiş şəxs tərəfindən əldə edilmədikdə, ilk olaraq həmin mənzil gözləmə qaydasında birinci sırada seçmiş şəxsə təklif ediləcək. Eyni qaydada, əgər mənzil hər hansı bir səbəbdən birinci sırada seçmiş şəxs tərəfindən də əldə edilməsə, həmin mənzil gözləmə qaydasında ikinci sırada seçmiş şəxsə təklif ediləcək.
Mənbə:My Webpage