Fövqəladə hallar naziri Kəmaləddin Heydərovun oğlu, Avropa Azərbaycan Cəmiyyətinin təsisçisi Tale Heydərovun məktəbindən narazılıq olunub.

Azia.az-n verdiyi xəbərə görə, valideynlər Avropa Azərbaycan Məktəbinin verdiyi təhsildən şikayətləniblər.

Onlar övladlarını oradan çıxarıb, başqa təhsil müəssisəsinə yerləşdirmək istəyir. Ancaq müqaviləyə görə, ödənilmiş təhsil haqqının müəyyən faizi onlara qaytarılmalı olsa da, məktəb bundan boyun qaçırır.

Bu barədə yenicag.az-a Avropa Azərbaycan Məktəbində təhsil alan şagirdlərdən birinin valideyni Vüsalə Hacıyeva məlumat verib.

V.Hacıyeva bildirib ki, Avropa Azərbaycan Məktəbində təhsil haqqı çox bahadır, ancaq bunun qarşılığında verdikləri təhsilin səviyyəsi qat-qat aşağıdır:

“10 min 500 manat təhsil haqqı ödəmişik. Ancaq uşaqların təhsil səviyyəsi çox aşağıdır. Bunu təkcə mən yox, bir neçə valideyn deyir. Dəfələrlə məktəb rəhbərliyinə şikayət etmişik”.

V.Hacıyeva qeyd edib ki, şikayət edən valideynin uşaqlarına çox aşağı qiymət yazırlar: “Şikayət etdiyimiz üçün mənim və bir neçə valideynin uşağına 2, 3 qiymətləri yazıblar. Bu yaxında hətta uşaqlardan birinə 1 qiyməti yazmışdılar.

Uşaqlara bu qiymətlər yazılandan sonra motivasiyaları düşür, məktəbə getmək istəmirlər. Buna görə də qərar verdim ki, övladımı həmin məktəbdən çıxarım. Bu zaman isə başqa bir problem ortaya çıxdı”.

“Müqaviləyə görə, uşaq məktəbdən çıxarsa, ödənilmiş təhsil haqqının müəyyən faizi geri ödənməlidir” deyən valideyn bu məbləği tələb etsə də, məktəb rəhbərliyinin bir həftədən çoxdur bu müraciətə əhəmiyyət vermədiyini qeyd edib:

“Bir həftədən çoxdur məktəb rəhbərliyi ilə görüşmək istəyirəm. Ancaq hər dəfəsində deyirlər ki, məktəbdə deyil. Ödədiyim təhsil haqqının müəyyən faizini tələb edirəm, həll edəcəyik deyib, etmirlər.

Məktəbin adı “Avropa Azərbaycan Məktəbi”dir, ancaq Avropadan xəbərləri yoxdur. Pul tələb edəndə, təhsil haqqı ödəmək lazım olanda adamın gözün tökürlər, ancaq problem yarananda yoxa çıxırlar”.

Sonda V.Hacıyeva vurğulayıb ki, Bakı şəhər məktəbləri uşağı məktəbə götürməkdən imtina edir. Buna görə də Təhsil Nazirliyinə və Bakı Şəhər Baş Təhsil İdarəsinə şikayət edib. Avropa Azərbaycan Məktəbinin direktoru Qari Qrippindir.

Cahan.info media istinadla xəbər verir ki, burada qiymətlər dodaq uçurdacaq səviyyədədir. Belə ki, 1-4-cü siniflər üçün 9800 manat, 5-9-cu siniflərə 12 000 manatdır. 10-11-ci siniflər üçün 14 000 manat nəzərdə tutulub.

Bu məktəbin təsisçisi fövqəladə hallar naziri Kəmaləddin Heydərovun oğlu Tale Heydərovdur. Nazir oğlu 2011-ci ildə Bakıda özəl Avropa Azərbaycan Məktəbinin əsasını qoyub.

T.Heydərov məktəbin Himayədarlar Şurasının Prezidentidir. Məktəbdə guya aztəminatlı ailələlərin övladları üçün güzəştlər tətbiq edilir. Ancaq heç bir güzəştdən söhbət gedə bilməz. Çünki bu məktəbdə aztəminatlı ailənin övladları təhsil almırlar.

“The International School of Azerbaijan” məktəbində isə təhsil bağça yaşından başlayır. Burada valideynlər uşaqlarının məktəbə hazırlığı üçün 11 min ABŞ dolları ödəməlidir.

1-ci sinifdən 9-cu sinfədək isə təhsil haqqı illik olaraq 34 min ABŞ dolları təşkil edir. 9-cu sinifdən yuxarı isə təhsil haqqı təxminən 40 min ABŞ dollarıdır. “Bakı Türk Liseyi”ndə illik ödəniş 8000 manat, “Dədə Qorqud” liseyində isə 5550 manatdır.

Paytaxtda türk liseyləri arasında qiymətinə görə, ən münasibi “Atatürk liseyi”dir ki, onun da illik təhsil haqqı 1500 manatdır.

Bu arada araşdırmaçi jurnalist Cavanşir Həsənli özünün feysbuk səhifəsində yazıb ki, 2003-cü ildə Kəmaləddin Heydərovun oğlu Tale Heydərov Londonda oxuduğu İqtisadi və siyasi elmlər məktəbində bakalavr təhsili alan İran əsilli Almaniya vətəndaşı Şahin Namati-Nasab ilə tanış olur, dostluq münasibətləri qurur.

2006-cı ildə atasının fövqəladə hallar naziri təyin olunmasının ardınca London Azərbaycan Cəmiyyətini yaradan Tale Heydərov Şahin Namati-Nasabı da təşkilata cəlb edir. 2008-ci ildən Avropa Azərbaycan Cəmiyyəti adlanan qurumun Almaniya şöbəsi Şahin Namati-Nasaba həvalə edilir.

2010-cu ildə "Avropa Azərbaycan Cəmiyyəti Almaniya" Gmbh 25 min avro nizamnamə kapitalı ilə Şahin Namati-Nasabın adına qeydiyyatdan keçirilir və Charlottenburg (Berlin) ədliyyəsində HRB 135324 B saylı şəhadətnamə alır. Hazırda ofisi Berlinin mərkəzindəki Bellevuestr. 1 ünvanında yerləşir.

Heydərovların Almaniyadakı şirkətləri məhz Şahin Namati-Nasabla Tale Heydərovun Londondakı məktəbdən başlayan dostluğu üzərində qurulur.

Heydərovların təqdimatı ilə Şahin Namati-Nasab Azərbaycan hakimiyyətinin sevimlisinə çevrilir, Azərbaycanı səfirliyi ilə sıx münasibətlər qurur, tədbirlərə dəvət olunur. Qarabağ və Xocalı ilə bağlı tədbirlərə qatılır.