Yeni neft və qaz yataqlarının kəşfiyyatı və işlənməsinə davamlı investisiya qoyuluşu indi həmişəkindən daha vacibdir.

Bu, ABŞ enerji nəhəngi ExxonMobil-in Qlobal Vizion sənədində əksini tapıb: "Bizim proqnozumuz göstərir ki, yeni investisiyalar olmasa, neft hasilatı ildə təqribən 15 faiz azalacaq. Bu, qlobal istehsal strukturunun "qeyri-ənənəvi" mənbələrə doğru dəyişməsinin nəticəsidir. "Yeni investisiyalar olmadan" dedikdə, biz bu gün bütün maliyyələşmənin dayandığı bir ssenarini nəzərdə tuturuq. Artıq kapital qoyulmur və istehsalçılar yalnız mövcud quyuları “sıxmaqla” məşğuldular. Bu, qlobal neft tədarükünün gündə təxminən 70 milyon barel kəsirinə səbəb olar”.

Şirkət həmçinin sərmayələrin yalnız mövcud yataqlara - onların istismarının davam etdirilməsinə və qazma işlərinin doldurulmasına yönəldiləcəyi vəziyyəti modelləşdirib: "Bu, geoloji kəşfiyyata sərmayə qoymağa imkan vermir ki, yeni yataqlar kəşf edilsin və artıq kəşf edilmiş yataqlar genişlənsin. İnvestisiyaların yalnız mövcud yataqlarla məhdudlaşdırılması hasilatda azalmanı təxminən 4 faizə qədər ləngidərdi".

ExxonMobil-in proqnozuna görə, neftə tələbat 2024-cü ildəki 100 milyon bareldən 2050-ci ilə qədər gündə təxminən 105 milyon barrelə çatacaq.

Qeyd olunur ki, enerji resurslarına daim artan tələbatı ödəmək üçün əhəmiyyətli dərəcədə təbii qaz tədarükü də lazımdır: "Yeni investisiyalar olmadıqda qlobal təbii qaz təchizatı ildə təxminən 11 faiz azalacaq, 2030-cu ilə qədər gündə təxminən 250 milyard kubfut qaz kəsiri ilə nəticələnəcək ki, bu da proqnozlaşdırılan qlobal tələbin təxminən yarısıdır. İnvestisiyaların yalnız mövcud yataqlara məhdudlaşdırılması azalmanı ildə təxminən 3 faizə qədər ləngidə bilər".

Qeyd edək ki, avqustun əvvəlində ExxonMobil SOCAR-la anlaşma memorandumu imzalayıb. Bəzi məlumatlara görə, şirkət Azərbaycanda quruda neft hasilatına sərmayə yatıracaq. Musavat.com