Gürcüstandakı Azərbaycanlıların sərhədlər vasitəsilə gediş-gəlişində problemlər gündəmdədir.

Sərhədlərin bağlı qalması vətəndaşların, xüsusilə yaşlıların və maddi imkanları məhdud şəxslərin qohumları ilə görüşməsini çətinləşdirir.

Məsələ ilə bağlı Gununsesi.info-ya danışan Milli Məclisin deputatı Fazil Mustafa bildirib ki, sərhədlərin bağlı qalması vətəndaşların, xüsusilə yaşlıların və maddi imkanları məhdud şəxslərin qohumları ilə görüşməsini çətinləşdirir:

“Gürcüstan Azərbaycanlılarının bu problemi həll edilməlidir. Belə əziyyətlə gedib-gəlmək mümkün deyil. Soydaşlarımız üçün müəyyən güzəştlərin tətbiqi faydalı olar.

Çünki güzəştlər olmayanda müəyyən çətinliklər özü-özlüyündə yaranır. Xüsusilə yaşlı insanlar üçün bu ciddi problemdir. Bəziləri təyyarəyə minə bilmir, bəziləri valideynini ziyarət edə bilmir. Maddi imkanları az olanlar isə öz maşını ilə və ya digər vasitələrlə səyahət edə bilmir. Ona görə də bu məsələ hər halda öz həllini tapmalıdır.

Ən azı müəyyən insanlara bu imkan tanınmalıdır: tələbələr, xəstələr, müalicə üçün səfər edənlər, xəstəyə baş çəkmək istəyənlər. Onlara hər hansı formada köməklik göstərilməlidir”.

Deputat vurğulayıb ki, Gürcüstandakı soydaşlarımızdan heç bir halda məsafə qoya bilmərik.

“Onlar bizim qan qardaşımızdır, bizim soydaşlarımızdır və bizim iç-içə bir yaşamımız var. Ona görə də onların sıxıntıya düşməsinə imkan vermək olmaz”-deyə o, əlavə edib.

 Şəbnəm Rəhimova