Bir çox insan südü soyuducunun qapı hissəsində saxlayır. Lakin qida təhlükəsizliyi üzrə mütəxəssislər bu vərdişin məhsulun daha tez xarab olmasına səbəb ola biləcəyini bildirirlər.

Azia.az Demokrat.az-a istinadən bildirir ki, soyuducunun qapısı temperatur dəyişikliklərinin ən çox yaşandığı hissədir. Qapı hər açılıb-bağlandıqda isti hava ilk olaraq bu sahəyə daxil olur. Nəticədə südün saxlandığı temperatur sabit qalmır və məhsulun xarab olma riski artır.

Süd kimi tez xarab olan məhsullar soyuducunun orta və ya arxa rəflərində saxlanmalıdır. Həmin hissələrdə temperatur daha sabit olur və məhsul uzun müddət təravətini qoruyur.

Qida təhlükəsizliyi üzrə ekspertlər bildirirlər ki, südün ideal saxlanma temperaturu təxminən 2-4 dərəcə arasında olmalıdır. Məhsul açıldıqdan sonra istifadə edildikdən dərhal sonra yenidən soyuducuya yerləşdirilməlidir.

Araşdırmalar göstərir ki, soyuducunun qapısında saxlanılan süd temperatur dalğalanmalarına daha çox məruz qalır. Bu isə bakteriyaların çoxalmasını sürətləndirə və məhsulun raf ömrünü qısalda bilər.

Uzun müddətdir soyuducunun qapısında saxlanılan və dadında, qoxusunda və ya görünüşündə dəyişiklik müşahidə olunan süd istehlak edilməməlidir. Belə məhsulların atılması daha təhlükəsiz hesab olunur.

Qida təhlükəsizliyi üzrə tövsiyələrə görə, soyuducunun qapı hissəsi daha çox ketçap, sous, mürəbbə və digər nisbətən dayanıqlı məhsullar üçün uyğundur. Süd və digər tez xarab olan məhsullar isə daxili rəflərdə saxlanmalıdır.

İsmayıl