2022-ci ildə Yaponiyada açılışı gözlənilən Azərbaycan məhsullarından ibarət mağazada "ABAD” məhsulları təqdim olunacaq, bu Anews.az-ın gmail sorğusuna cavab olaraq "ABAD” publik hüquqi şəxsin mətbuat xidmətindən bildirilib.

Cari ilin 22 iyun – 24 iyun tarixlərində Yaponiyanın paytaxtı Tokio şəhərində baş tutacaq "II Beynəlxalq qida sərgisi”ndə "ABAD” məhsulları da sərgilənəcək.

Bu barədə ötən ilin dekabrında "ABAD” publik hüquqi şəxsin Yaponiyanın "TET International Development” şirkəti ilə sayca 5-ci görüşündə qərar verilb

İndiyə kimi iki qurumun əməkdaşlığı çərçivəsində "ABAD”çıların məhsulları: ədviyyatlar, meyvə araqları və çiçək tozu Yaponiyaya ixrac olunub.

Hazırda "ABAD” publik hüquqi şəxsin Azərbaycanda 10 etno-butiki fəaliyyət göstərir. Onlardan altısı Bakıda, digərləri Şamaxı, Qəbələ, Masallı və Şəki rayonlarında fəaliyyətdədir.

"Həmçinin. 2021-ci ildə məişət texnikası, mebel, tekstil və digər ev əşyalarının satışı üzrə ixtisaslaşmış Azərbaycanın ən böyük riteyl şəbəkələrinin birində "ABAD” guşəsi açılıb. 2022-ci ildə isə daha iki "ABAD” etno-butikinin açılışı nəzərdə tutulub Cari ildə paytaxtda və Sumqayıtda iri marketlərində dörd "ABAD” Bakaleyası və 24 "ABAD” stendi fəaliyyət göstərir. Onlardan 11-inin açılışı 2021-ci ilin üzərinə düşüb. "ABAD” məhsullarını xaricdə Azərbaycan Ticarət Evlərində, Qazaxıstanda fəaliyyət göstərən bəzi marketlər şəbəkəsində əldə etmək mümkündür. "ABAD” qida məhsullarının istehlakçısının böyük əksəriyyəti, demək olar ki, yerli əhalidir. Suvenirlərin isə alıcısı daha çox xarici qonaqlardı: MDB, ərəb ölkələri, Avropa və s. ölkələrdən gələn qonaqlar”, - deyə mətbuat xidmətindən bildirilib.

Azərbaycan Respublikası Prezidentinin 23 sentyabr 2016-cı il 1047 nömrəli Fərmanına əsasən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində "ABAD” (Ailə Biznesinə Asan Dəstək) publik hüquqi şəxs yaradılıb.

"ABAD” publik hüquqi şəxsin yaradılmasında məqsəd Azərbaycan Respublikasının sosial-iqtisadi inkişafında vətəndaşların fəal iştirakına, kiçik və orta sahibkarlığın inkişafına, əhalinin məşğulluq səviyyəsinin artırılmasına və rəqabətqabiliyyətli ailə təsərrüfatlarının formalaşdırılmasına dəstək vermək məqsədi ilə sosialyönümlü layihələrin həyata keçirilməsidir.

18 yaşına çatmış və Azərbaycan Respublikasının ərazisində qeydiyyatda olan şəxs "ABAD”ın dəstək verdiyi müvafiq istiqamətlər üzrə müraciət edə bilər. Hazırda bu prioritet olaraq dekorativ-tətbiqi xalq sənətkarlığı və qida məhsullarının istehsalı sahələridir.