İsti yay günlərində bədənimizi sərinləşdirəcək və tamamilə təbii içkidən daha gözəl nə ola bilər? Mağazalarda satılan və tərkibində qatqı maddələri olan hazır içkilər yerinə, evdə cəmi bir neçə limonla möhtəşəm limonad hazırlaya bilərsiniz.

Pravda.az yay aylarının əvəzedilməzi olan ev üsulu limonadın hazırlanmasını təqdim edir:

Lazım olan ərzaqlar:

4 ədəd böyük limon

1 ədəd portağal (rəng və fərqli bir aroma verməsi üçün)

1 stəkan şəkər tozu (şirinliyi zövqə görə tənzimlənə bilər)

5-6 stəkan soyuq su

10-15 yarpaq təzə nanə (istəyə görə)

Buz kubları

Hazırlanma qaydası:

Qabıqların rəndələnməsi

Limonların və portağalın qabıqlarını sürtgəcin incə gözündən rəndələyin. Qabıqların altındakı ağ hissəni rəndələməməyə diqqət edin, çünki ağ hissələr limonada acılıq verə bilər.

Şəkərlə ovma mərhələsi

Rəndələdiyiniz qabıqları geniş bir qaba qoyun və üzərinə şəkər tozunu əlavə edin. Əllərinizlə şəkəri və qabıqları yaxşıca, şəkər rəngini dəyişənə və limon yağları tamamilə ortaya çıxana qədər ovun. Bu üsul limonadınızın həm ətrini, həm də dadını ikiqat artıracaq.

Şirənin əlavə edilməsi

Qabıqlarını rəndələdiyiniz limonların və portağalın suyunu yaxşıca sıxın. Sıxdığınız bu təbii şirəni şəkərli qabığın üzərinə əlavə edin. Şəkər tamamilə əriyənə qədər qarışdırın. Əgər istəsəniz, bu mərhələdə içərisinə bir neçə yarpaq təzə nanə də atıb yüngülcə əzə bilərsiniz.

Suyun əlavə edilməsi və süzülməsi

Bu konsentrə qarışığın üzərinə 5-6 stəkan soyuq su əlavə edib yaxşıca qarışdırın. Hazırladığınız limonadı incə bir süzgəcdən və ya tənzifdən keçirərək qabıq və nanə qalıqlarından təmizləyin və sürahiyə boşaldın.

Hazırladığınız limonadı ən azı 1-2 saat soyuducuda saxlayaraq tam soyumasını təmin edin. Servis edərkən stəkanlara bol buz qoyun, üzərinə soyuq limonadı süzün. Stəkanın kənarına bir dilim limon taxıb və içərisinə təzə nanə yarpaqları ataraq vizual bir ziyafət yarada bilərsiniz.

Limonadınızın daha fərqli və fərahladıcı olmasını istəyirsinizsə, suyun yarısını adi su, digər yarısını isə qazlı mineral su (qazlı su) olaraq əlavə edə bilərsiniz.

Əminə Bayramova