Rusiyanın kömür sənayesində ciddi böhran yaşanır. Bu böhran 23 müəssisənin fəaliyyətinin dayandırılmasına səbəb olub.

Musavat.com xəbər verir ki, məlumatı Rusiya dövlət katibi - energetika nazirinin müavini Dmitri İslamov "İnterfaks"a açıqlayıb: "Biz bütün şirkətləri izləyirik, hazırda "qırmızı zona"da 53 müəssisə var. Onlardan 23-ü fəaliyyətini dayandırıb. Bu, təbii ki, əsasən Kuzbassdır".

Avqustun 26-da Kemerovo vilayətinin hakimiyyət orqanları regionda 17 kömür hasilatı müəssisəsinin fəaliyyətini dayandırdığını elan edib.

İslamov onu da qeyd edib ki, indiyədək Rusiyada hasilatın 80-85 faizini təmin edən 129 kömür mədəni və açıq şaxta dövlət dəstəyi üçün müraciət edib, maliyyə naziri Anton Siluanovun rəhbərlik etdiyi xüsusi yaradılmış alt komitə isə artıq 42 müəssisəyə baxıb.

İyulun ortalarında Maliyyə Nazirliyi kömür sənayesinin dəstəklənməsi tədbirləri haqqında hökumətə qərar layihəsi təqdim edib ki, bu da xüsusilə faydalı qazıntıların hasilatı vergisinin və bəzi sığorta haqlarının ödənilməsində onlara 2025-ci il noyabrın 30-dək möhlət verilməsini nəzərdə tutur. İslamov avqustun 29-da qeyd edib ki, fərdi qaydada, alt komitənin qərarı ilə kömür şirkətlərinə vergi və sığorta haqlarının ödənilməsi üzrə möhlət verilməsi kimi dəstək tədbirləri daha uzun müddətə uzadıla bilər.

Vergilərin və sığorta haqlarının möhlətinin 2026-cı ilə qədər uzadılmasının mümkünlüyü, eləcə də bütün kömür şirkətləri üçün sistemli olaraq digər dəstək tədbirləri barədə suala İslamov cavab verib ki, Energetika Nazirliyi bu məsələni araşdırır: "İndi qərar dekabrın 1-dək qəbul edilib. Biz işin nəticələrinə baxmalıyıq - biz indi ilin birinci yarısını təhlil edirik, növbəti 9 ayı da təhlil edəcəyik".

Qeyd edək ki, iyulda Rusiyada kömür hasilatı illik müqayisədə 1,9 faiz azalaraq 31,5 milyon ton təşkil edib. Daş kömürünün hasilatı 5% azalaraq 24,5 milyon tona, antrasit hasilatı 23,1% azalaraq 1,2 milyon tona düşüb. Kokslaşan kömür hasilatı 7,6 milyon tona düşüb ki, bu da ötən ilin müvafiq dövrü ilə müqayisədə 12,6% azdır.