“Azərbaycanda fətvanı hörmətli şeyxülislam Allahşükür Paşazadənin rəhbərliyi ilə Qafqaz Müsəlmanları İdarəsi verir. Təəssüf ki, hələ də İranın agentura şəbəkəsi buna qarşı çıxır və qarşı çıxmağa davam edir. İranın dini rəhbərinin şəkli ilə Aşura günündən bir gün sonra meydana çıxmaq Azərbaycan dövlətinə və dövlətçiliyinə meydan oxumaq deməkdir. Buna cəhd edən İran casuslarına qarşı sərt tədbirlər görülməlidir. Yumşaq tədbirlər, başa salmaq bunlara keçmir. Dövlətin sərt üzü bu agentura şəbəkəsinə göstərilməlidir”.

Bu sözləri Pravda.az-a açıqlamasında Milli Məclisin İctimai birliklər və dini qurumlar komitəsinin üzvü Elşad Musayev deyib.

“Uzun müddətdir, müşahidə etmişik ki, İran casusları, İranın təsirində olanlar Azərbaycanda yas mərasimlərində və digər tədbirlərdə çox açıq şəkildə dövlətimizə və dövlətçiliyimizə qarşı açıq-aşkar "din" pərdəsi altında meydan oxuyublar. Zaman keçir, hamısı öz yerini-yurdunu bilir. Son zamanlar müəyyən gərginliklər yaratmaq istəsələr də, dövlət onların qarşısını aldı. Aşura günü də növbəti cəhdi etdilər. Heç kimə sirr deyil ki, İran uzun müddət "din" pərdəsi altında Azərbaycanda müəyyən qaranlıq işlərlə məşğul olub. İranın casusları, eyni zamanda təsir agentləri indi də Azərbaycanda kifayət qədərdir. Bu proses ölkəmizdə xüsusilə məscidlərdə, müəyyən ticarət məkanlarında aparılıb. Təbii ki, dövlət buna qarşı öz tədbirlərini görür. Xüsusi xidmət orqanlarımız İranın casusluq fəaliyyəti, buradakı agentura şəbəkəsi və onların əməlləri ilə bağlı ciddi araşdırma aparır. İran casuslarının xeyli hissəsi həbs olunub”, - deputat bildirib.

Aytəkin Qardaşova