AMEA daha bir nüfuzlu beynəlxalq elmi quruma – Akademiyalararası Tərəfdaşlıq Assosiasiyasına (IAP) üzv seçilib. Bu münasibətlə təşkilatın rəhbərliyi adından AMEA-ya təbrik məktubu göndərilib.

Məktubda deyilir:

“Akademiyalararası Tərəfdaşlıq Assosiasiyası (IAP) adından məmnuniyyətlə bildiririk ki, Azərbaycan Milli Elmlər Akademiyası (AMEA) IAP İdarə Heyəti tərəfindən İAP üzvlüyünə qəbul edilib.

Tam üzvlük sertifikatı 2025-ci ildə keçiriləcək növbəti IAP Baş Assambleyası tərəfindən təqdim olunacaqdır. Bu müddət ərzində siz səsvermə istisna olmaqla, IAP-nin bütün fəaliyyətinə qoşula bilərsiniz və IAP-nin saytında Akademiyanızın öz profil səhifəsi olacaq. Xahiş edirik aşağıda müvafiq bölməyə keçidlə tanış olun: www.interacademies.org/network/member-academies

Zəhmət olmasa, IAP-nin internet saytında yerləşdirmək və qeydlərimizə daxil etmək üçün IAP Katibliyinə ([email protected]) aşağıdakı məlumatları təqdim edin:

- Akademiyanın loqosu (yüksək keyfiyyətli);

- Akademiya haqqında məlumat;

-  Hazırkı prezidentin adı və şəkli (yüksək keyfiyyətli);

-  Akademiyada əlaqələndirici şəxslərin adları və email ünvanları.

Hər hansı bir sualınız olarsa, zəhmət olmasa bizimlə əlaqə saxlayın.

IAP-nin işinə qoşulduğunuza görə, Akademiyanızı təbrik edirik. Sizinlə işləməyi səbirsizliklə gözləyirik. Uğurlar arzulayırıq.

Hörmətlə,

Ourania Kosti

İcraçı Direktor

Akademiyalarası Tərəfdaşlıq Assosiasiyası”.

Məlumat üçün bildiririk ki, AMEA 2023-2024-cü illərdə Beynəlxalq Elmi Şura, Asiya Elmlər Akademiyaları və Elmi Cəmiyyətləri Assosiasiyası və Avrasiya Universitetlər Birliyi kimi akademik qurumların da üzvü seçilib.

AMEA Rəyasət Heyəti aparatının

İctimaiyyətlə əlaqələr, mətbuat və informasiya şöbəsi