Azərbaycanda "Kapital Bank"dan külli miqdarda oğurluq etməkdə təqsirləndirilən Pakistan vətəndaş Abbas Moazzamın cinayət işinin istintaq materialları məlum olub.



Məlumata görə, 1996-cı il təvəllüdlü Abbasın cinayət işi üzrə ittiham aktına qeyd edilib ki, Moazzam elektron məlumat daşıyıcılarından və informasiya texnologiyalarından istifadə etməklə özgənin əmlakını gizli olaraq talamayıb.



Belə ki, o, Pakistan vətəndaşı olan qrupun digər üzvü və qeyriləri ilə əvvəlcədən razılaşıb cinayət əlaqəsinə girərək qabaqcadan əlbir olan bir qrup şəxs halında birləşib. Bu məqsədlə 2022-ci ilin yanvar ayının əvvəllərindən etibarən qrupun digər üzvü ABŞ, Kanada, Honq-Konq və Kolumbiya banklarının müştərilərinə aid bank kartı məlumatlarını qanunsuz əldə edərək həmin hesablarda olan pul vəsaitlərinə ölkə ərazisində müxtəlif saat və cihazların satışını həyata keçirib, hesabları isə “Kapital Bank” ASC-də açıblar. Həmin bank tərəfindən xidmət göstərilən “saatstore.az”, “alinino.az”, “apple-azerbaıjan.az”, “e-alver.az”, “mgstore.az”, “myshops.az” adlı və digər internet dükanlarından qol saatı, mobil telefon, simsiz qulaqlıqlar, notbuk, makbuk, planşet, oyun aparatı, videokamera və s. elektronika mallarının onlayn qaydada alışını etdikdən sonra Abbas qrupun digər üzvləri ilə aralarında olan cinayətkar razılaşmaya və rol bölgüsünə əsasən onlayn satış həyata keçirən dükanların kuryer xidmətlərindən məhsulları Bakı şəhərində müxtəlif ünvanlarda qəbul etməklə səyyar qaydada nağd pula satışını həyata keçirib.



Moazzam 2022-ci ilin yanvar ayının ortalarından etibarən məhsulların bir hissəsini metronun “Neftçilər” stansiyası yaxınlığında yerləşən “Real Mobile” və “Lombard Telecom” adlı mobil telefon satışı məntəqələrinə rəsmi sənəd əsasında orta bazar qiymətindən ucuz satıb nağd şəkildə əldə etdiyi pulun bir hissəsini özünə qazanc kimi götürüb. O, pulun digər hissəsini isə cinayətkar qrupun digər üzvünə göndərib.



Beləliklə, Abbas Moazzam müştərilərinin hesablarından pul vəsaitləri oğurlamaqla “Kapital Bank”a ümumilikdə 228.418,47 manat ziyan vurub.



Daha sonra bank Azərbaycan Daxili İşlər Nazirliyi Baş Mütəşəkkil Cinayətkarlıqla Mübarizə İdarəsinə müraciət edib. İdarənin keçirdiyi əməliyyat tədbirləri nəticəsində Abbas bu ilin yanvarında saxlanılıb.



Onun barəsində Cinayət Məcəlləsinin 177.3.2-ci (Külli miqdarda ziyan vurmaqla oğurluq törətmək) maddəsi ilə ittiham irəli sürülüb.



Məhkəmə iclasında Moazzam ona qarşı elan olunmuş ittihamda özünü təqsirli bilməyib. O ifadəsində göstərib ki, Bakı şəhərinə həm işləmək, həm də təhsil almaq məqsədilə gəlib. Dindirilmə zamanı dediyinə görə, 3 ildir ki, Bakı şəhərində yaşayır, Rəssamlıq Akademiyasında təhsil alır.



Məhkəmənin hökmü ilə o, 7 il 6 ay müddətinə azadlıqdan məhrum edilib.