Dövlət büdcəsini yağmalamış, özünə və ailəsinə olduqca böyük biznes qurmuş sabiqlərdən Fazil Məmmədov ortalıqda gəzir. O nazir olduğu illərdə Əmək və Əhalinin Sosial Müdafiəsi naziri postunda böyük büdcə vəsaitlərinə sərəncam vermiş Səlim Müslümov isə bu gün həbsdədir. Halbuki Fazil Məmmədov büdcə vəsaitlərinin dalına keçməkdə Səlim Müslümovdan da fərasətli idi.

Səlim Müslümovun həbsindən sonra onun büdcədən 1 milyard manata yaxın vəsait çırpışdırması iddiaları ortaya çıxıb və həmin iddialar bu günə qədər də təkzib edilməyib. Bu ilin fevralında həbsə alınan Səlim Müslümovun barəsində cinayət işi araşdırılmaqdadır. Onun həbsi ilə bağlı Dövlət Təhlükəsizliyi Xidmətinin yaydığı məlumatda bildirilirdi ki, nazir vəzifəsində işlədiyi müddətdə nazirliyin fəaliyyət istiqamətləri üzrə əlillərin və sağlamlıq imkanları məhdud uşaqların reabilitasiyası və sosial müdafiəsinin təşkil edilməsi, işəgötürənlərin əmək, məşğulluq və sosial müdafiə məsələləri ilə bağlı fəaliyyətlərinə dövlət nəzarətinin həyata keçirilməsi və digər səlahiyyətlərin yerinə yetirilməsi zamanı çoxsaylı sui-istifadə hallarına yol verməsi araşdırılır. Toplanılmış materiallar əsasında başlanılmış cinayət işi üzrə Səlim Müslümovun xidməti vəzifələrinin icrası ilə əlaqədar özü üçün qanunsuz üstünlüklər əldə etmək məqsədilə qulluq səlahiyyətlərindən tamah niyyəti ilə qulluq mənafeyinə qəsdən zidd olaraq istifadə edib dövlətin qanunla qorunan mənafelərinə ağır nəticələrə səbəb olan zərər vurmasına, habelə onun tərəfindən tabeçiliyində işləyən vəzifəli şəxslərdən vasitəçi kimi istifadə etməklə müxtəlif rayonlarda əlillər üçün fərdi yaşayış və internat evlərinin tikinti-təmirinin aparılması işlərini yerinə yetirən fiziki və hüquqi şəxslərə ayrılmış pul vəsaitlərinin bir hissəsinin tələb edilərək alınmasına əsaslı şübhələr müəyyən edilib.

Həmçinin Səlim Müslümovun nazirliyin Dövlət Əmək Müfəttişliyi Xidməti tərəfindən ölkə ərazisində istehsal, sosial-məişət və iaşə təyinatlı obyektlərin inşası və yenidən qurulması zamanı əməyin mühafizəsi tələblərinə əməl olunması, onların istismara buraxılmasına razılığın verilməsi, əməyin mühafizəsi tələblərinə uyğunluğu ilə bağlı müəssisələrdə aparılmış yoxlamaların nəticələrinə görə müxtəlif vaxtlarda külli miqdarda pul vəsaitləri qismində təkrar rüşvət almasına dair məlumatlar əldə olunub. Eyni zamanda, daxili nəzarət şöbəsi tərəfindən ərazi strukturlarında aparılmış yoxlamaların nəticələri ilə bağlı onun həmin nazirliyin müxtəlif ərazi şöbələrinin rəhbərlərinin hər birindən 10 mindən 30 min manatadək külli miqdarda təkrar rüşvət almasına əsaslı şübhələr müəyyən edilib. Səlim Müslümov Azərbaycan Respublikası Cinayət Məcəlləsinin 308.2-ci (ağır nəticələrə səbəb olan vəzifə səlahiyyətlərindən sui-istifadə), 311.3.2-ci və 311.3.3-cü maddələri (təkrar külli miqdarda rüşvət alma) ilə təqsirləndirilən şəxs qismində məsuliyyətə cəlb olunaraq barəsində məhkəmənin qərarı ilə həbs qətimkan tədbiri seçilib. Dekabrın 14-də Səlim Müslümov barəsindəki həbs qətimkan tədbirinin müddəti bitir. Müddət bitənə qədər Səlim Müslümov barəsindəki cinayət işi yekunlaşdırılaraq məhkəməyə göndəriləcək.

Fazil Məmmədova gəlincə, o, vəzifədən çıxarılandan sonra isə həbs ediləcəyi xəbərləri bir-birini əvəzləyirdi. Vergilər naziri vəzifəsində Azərbaycan sahibkarlığına qarşı cinayətə bərabər addımlarının araşdırılması gündəmdə idi. Bu gün də Fazil Məmmədovun nazirliyi dövründə baş verən qanunsuzluqlar araşdırılacağı günü gözləyir.

Vəzifədən çıxarılandan sonra “öldü”, “xəstədir” xəbərləri bir-birini əvəzləsə də, bu gün Fazil Məmmədov rahat həyatını yaşayır. Onun səhhəti normaldır və hazırda Bakıda işləri ilə məşğuldur. Əlində nazir olduğu dövrdə cəmləşdirdiyi biznesi ilə məşğul olur. Fazil Məmmədov nazir olduğu dövrdə, 2010-cu ildə təsis edilmiş “Synergy Group” MMC Azərbaycanda fəaliyyət göstərən ən iri özəl investisiya şirkətlərindən biri idi.

“Synergy Group” MMC qeyri-neft sektorunda müxtəlif və inkişaf yönümlü şirkətlərdən ibarət idi. İstehsalat, tikinti, kənd təsərrüfatı, İKT, otelçilik, təhsil, səhiyyə və bank işi sahələri üzrə iri yatırımlar edirdi. Şirkətlərin böyük əksəriyyəti Bakıdan kənarda yerləşməklə, regionların sosial-iqtisadi inkişafında mühüm paya malik olmuşdu.

Vəzifədən çıxarılandan sonra, Fazil Məmmədovun sağlıq durumu qəfil pisləşmişdi. 2018-ci ilin əvvəllərində Gəncə Beynəlxalq Hospitalında tibb elmləri üzrə fəlsəfə doktoru İlyas Həsənovun nəzarəti altında müalicə alan Fazil Məmmədovun sonrakı müalicəsinin Türkiyədə davam etdirilməsi qərara alınmışdı. F.Məmmədov 2018-ci ilin iyununda ambulans təyyarə ilə Türkiyəyə aparılıb. O “American Hastahanesi”nin professorları Orhan Bilge və Mustafa Keremin nəzarətində olub. Müayinələr zamanı Fazil Məmmədovda pankreatit aşkarlanmışdı. Sabiq nazir Türkiyədə olarkən səhhətinin nisbətən stabilləşdiyi dövrlərdə məşhur “Çırağan Palace”da dincəlirdi. Onun istintaqa cəlb edilməsinin ertələnməsi ilk dövrlərdə sağlıq durumu ilə izah olunsa da, sonradan Fazil Məmmədovun topladığı sərvətin böyük hissəsi ilə vidalaşması hesabına azadlıqda qalması xəbərləri yayılmışdı.

Adı uzun illər Azərbaycan mətbuatının diqqət mərkəzində olan isimlərdən biri də Rövşən Əkbərovdur. 44 günlük Vətən Müharibəsi günlərində qeybə çəkilən, möhtəşəm zəfərdən sonra Rusiyaya yollanan Rövşən Əkbərov sonradan ölkəyə çağırıldı və qandallandı. Hazırda cəzaçəkmə müəssisəsində 10 illik həbs cəzasını çəkən Əkbərov barəsindəki hökmdən apelyasiya şikayəti verib. Rövşən Əkbərov məhkəməyə müraciətində bərəsində bəraət hökmünün çıxarılmasını istəyir.

Qeyd edək ki, rəsmi məlumata əsasən, Rövşən Əkbərovun 2001-ci il mayın 31-dən iyunun 1-nə keçən gecə Kiyev şəhəri, Deqtyaryov küçəsi 7 ünvanda yerləşən “Sikora” kafesində yeyib-içdikdən sonra, saat 04 radələrində həmin kafenin yaxınlığında Elçin Əliyev ilə aralarında yaranmış cüzi münaqişə səbəbindən xuliqanlıq niyyəti ilə sonuncunun ürək nahiyəsinə kəsici-deşici predmetlə xəsarət yetirərək Elçin Əliyevi qəsdən öldürməsinə əsaslı şübhələr müəyyən edilib. Rövşən Əkbərova Cinayət Məcəlləsinin 12.1, 120.2.2 (qəsdən adam öldürmə) və 12.1, 221.3-cü (xuliqanlıq) maddələri ilə ittiham elan edilərək, barəsində məhkəmənin qərarı ilə həbs qətimkan tədbiri seçilib. Onun barəsində olan cinayət işinin istintaqı başa çatdırılaraq baxılması üçün Bakı Hərbi Məhkəməsinə göndərilib. Məhkəmənin hökmü ilə o, 10 il müddətinə azadlıqdan məhrum edilib. Hökmə əsasən, Rövşən Əkbərovun ittiham olunduğu Cinayət Məcəlləsinin 12.1, 221.3-cü (xuliqanlıq) maddəsi ittihamdan xaric edilib. Zərərçəkmiş tərəfin mülki iddiası qismən təmin olunub. Belə ki, məhkəmə Rövşən Əkbərovdan 40 min 10 manat pulun tutularaq zərərçəkmişin hüquqi varisi Fəday Əliyevə verilməsi barədə qərar çıxarılıb. Eyni zamanda məhkəmə Rövşən Əkbərovun hərbi rütbəsini və fəxri adlarının alınmasını zəruri hesab etməyib. Buna səbəb işdə hərbi rütbənin alınması ilə bağlı təqdimat olmadığı göstərilib.
“Yeni Müsavat”