azia.az
azia.az

Nazirlik Azərbaycan kinoteatrlarına xəbərdarlıq etdi

4-04-2017, 13:20

Nazirlik Azərbaycan kinoteatrlarına xəbərdarlıq etdi


Bu haqda nazirlik rəsmisi açıqlama verib

Ölkədə müstəqil şəkildə fəaliyyət göstərən “CinemaPlus” və “Park Cinema” kinoteatr şəbəkələri və onların nəzdindəki distributor şirkətləri arasında son zamanlar yaranmış xoşagəlməz münasibətlər cəmiyyətdə və internet məkanında müzakirələrə səbəb olub. Belə ki, yerli kinoteatrlar film istehsal edən yerli şirkətlər qarşısında müxtəlif şərt və tələblər qoymağa başlayıb. Kinoteatrların tələbinə görə, nümayiş olunacaq film bir kinoteatr şəbəkəsində göstərilirsə, digərində nümayiş oluna bilməz. Bu isə yerli film istehsalçılarının etirazına səbəb olub. Bundan başqa, onlar pik saatları daha çox əcnəbi filmlərə yer ayırıb. Şərtlər və tələblər isə bununla yekunlaşmır.

İstiPress xəbər verir ki, yaranmış bu hal Mədəniyyət və Turizm Nazirliyini də narahat edib. Nazirlik bununla bağlı rəsmi saytına ölkədə fəaliyyət göstərən kinoteatrlara xəbərdarlıq ünvanlayıb:

"Məntiqi izahı olmayan bu xoşagəlməz hal narahatlıq doğurmaya bilməz. Statusundan, fəaliyyət növündən asılı olmayaraq hər bir mədəniyyət müəssisəsinin vəzifəsi insanların asudə vaxtlarının səmərəli keçirilməsinə şərait yaratmaq və onlara yüksək səviyyəli mədəni xidmətin göstərməkdir. O cümlədən, kino sahəsində bir növ inhisarçı mövqe tutan müəssisələr tamaşaçı marağını hər şeydən üstün tutmalı və bu marağa zərər verə biləcək addımlara yol verilməməlidir.

Hazırda ölkəmizdə dövlət sifarişli filmlərlə yanaşı, müstəqil kino sahəsində də canlanma müşahidə edilməsi və milli filmlərə tamaşaçı marağının artması müsbət hal kimi xarakterizə oluna bilər. Bu prosesin inkişaf etməsi bütün maraqlı tərəflərin xoşməramlı münasibətindən asılıdır. Ona görə də kino fəaliyyəti ilə məşğul olan hər bir müəssisə özəl biznes maraqları ilə yanaşı, həm də ümumi mənafelərin qorunmasına çalışmalıdır.

Mədəniyyət və Turizm Nazirliyi tərəfləri məsələnin qarşılıqlı hörmət və anlaşma şəraitində müsbət həllinə və gələcəkdə də ictimai narazılıq doğuran halların baş verməməsi üçün son dərəcə diqqətli olmağa çağırır.

Bildiririk ki, Azərbaycan filmlərinin yayımının təşkil olunması ölkəmizdə fəaliyyət göstərən hər bir kinoteatrın vəzifə borcudur".


OXŞAR XƏBƏRLƏR
XƏBƏR LENTİ
BÜTÜN XƏBƏRLƏR

MARAQLI
TƏQVİM
MƏZƏNNƏ
 Valyuta məzənnəsi