Yaxın Şərqdə, xüsusilə də İran ətrafında vəziyyətin sürətlə gərginləşməsi region ölkələrinin diqqət mərkəzindədir. Artan hərbi-siyasi risklər fonunda beynəlxalq ictimaiyyət mümkün eskalasiya ssenarilərini müzakirə edir, aparıcı güclər isə həm hərbi hazırlıq, həm də diplomatik kanalları paralel şəkildə aktiv saxlayırlar.

KONKRET.az xəbər verir ki, Qərb mediasında yayılan məlumatlara görə, ABŞ regionda hava hücumundan müdafiə imkanlarını gücləndirir. Bu addım Vaşinqtonun Yaxın Şərqdə təhlükəsizlik risklərini ciddi qiymətləndirdiyini göstərir.

Eyni zamanda, diplomatik müstəvidə də intensiv təmaslar davam edir və hərbi qarşıdurmanın qarşısını almağa yönəlmiş variantlar nəzərdən keçirilir.

Bu mürəkkəb geosiyasi şəraitdə regional ölkələrin mövqeyi xüsusi əhəmiyyət daşıyır. Azərbaycan gərginliyin artdığı bir dövrdə məsuliyyətli və balanslı yanaşma nümayiş etdirərək diplomatik fəallığını ön plana çıxarır.

Bir neçə gün əvvəl İlham Əliyev İran prezidenti ilə telefon danışığı aparıb. Danışıq zamanı regiondakı vəziyyət müzakirə olunub, gərginliyin azaldılmasının vacibliyi vurğulanıb. Azərbaycan tərəfi problemlərin dialoq, qarşılıqlı anlaşma və beynəlxalq hüquq çərçivəsində həllinin tərəfdarı olduğunu bir daha bəyan edib.

Bu təmas Bakının regionda sabitliyin qorunmasında maraqlı olduğunu və konstruktiv rol oynamağa hazır olduğunu göstərir.

Azərbaycan uzun illərdir ki, mürəkkəb regional mühitdə balanslı xarici siyasət yürüdərək həm qonşularla münasibətləri qorumağa, həm də öz milli maraqlarını təmin etməyə çalışır.

Eyni zamanda, Türkiyənin də proseslərdə diplomatik təşəbbüslərlə çıxış etməsi regionda danışıqlar yolu ilə həll variantlarının hələ də aktual olduğunu göstərir. Regional aktorların fəallaşması böhranın nəzarətdən çıxmaması üçün mühüm amil kimi qiymətləndirilir.

Müşahidəçilərin fikrincə, hazırkı mərhələdə ən rasional yol gərginliyin diplomatik mexanizmlər vasitəsilə idarə olunmasıdır. Azərbaycan bu kontekstdə dialoqa açıq, sabitliyə töhfə verən və regional təhlükəsizliyin möhkəmlənməsində maraqlı tərəf kimi çıxış edir.

Artan risklər fonunda Bakının fəal diplomatiyası göstərir ki, Azərbaycan regionda baş verən proseslərə biganə qalmır və mümkün ssenarilərə əvvəlcədən hazır olmağa çalışır. Bu yanaşma ölkənin həm regional, həm də beynəlxalq səviyyədə etibarlı tərəfdaş imicini gücləndirir.

Müşviq Tofiqoğlu