Azərbaycanın aparıcı pərakəndə ticarət şəbəkələrindən olan “Araz”, OBA və SPAR marketlərin sahibi olan “Veysəloğlu” MMC-yə qarşı məhkəmə iddiası qaldırılıb.

Yeniavaz.com xəbər verir ki, “Veysəloğlu” MMC-yə qarşı qaldırılan iddiaya Bakı Kommersiya Məhkəməsinin hakimi Kənan Hüseynovun  sədrliyilə baxılacaq.

Məlumat üçün bildirək ki, “Veysəloğlu” MMC barəsində iddianı tanınmış daşınmaz əmlak şirkətlərindən biri olan “NPG Azerbaijan” MMC tərəfindən qaldırıb. İddia əmlak tələbi ilə bağlıdır.

Daha əvvəl qaldırılan iddia ilə əlaqədar olaraq 6 dəfə hazırlıq icalası baş tutub və hər dəfə də növbəti tarixə təxirə salınıb.

Qeyd edək ki, Bakı şəhəri Nizami rayonu, Keşlə ŞTQ, 2-ci eninə, ev 2 ünvanında qeydiyyatda olan “Veysəloğlu” MMC-nin nizamnamə kapitalı 8 milyon 826 min 172 manatdır. 2006-cı ilin may ayının 22-də dövlət qeydiyyatına alınan “Veysəloğlu” MMC-nin qanuni təmsilçisi Bəxtiyar Allahverdi Adil oğludur. Bəxtiyar Allahverdi eyni zamanda “Veysəloğlu” şirkətinin baş direktorudur.

2017-ci ilin aprel ayının 5-də dövlət qeydiyyatına alınan və nizamnamə kapitalı 100 manat olan “Veysəloğlu Grup” MMC-nin qanuni təmsilçisi isə Talıbov Aydın Veysəl oğludur.

Məlumat üçün bildirək ki, mətbuatda “Veysəloğlu” şirkəti və ona məxsus olan “Araz”, OBA və SPAR supermarketərinin sahibinin də məhz Aydın Talıbov olduğu bildirilir. Ehtimal etmək olar ki, şirkətin adı da Aydın Talıbovun atasının adına görə bu cür adlandırılıb.

Qeyd edək ki, Aydın Talıbov 1965-ci ildə Naxçıvan Muxtar Respublikasının Şərur rayonun Siyaqut kəndində anadan olub. Aydın Talıbov Naxçıvan MR-nin Ali Məclisinin sabiq sədri Vasif Talıbovun da məzun olduğu Siyaqut kənd orta məktəbini bitirərək ali təhsilini İqtisadyyat Universitetində davam etdirib. 1994-cü ildən biznes fəaliyyətinə başlayıb.