El dili ilə “Qocalar Evi” kimi tanınan Əmək və Əhalinin Sosial Müdafiəsi Nazirliyinin tabeçiliyində olan Bilgəhdəki Müharibə və əmək əlilləri üçün pansionatda baş verən haqsızlıqlar barədə saytımızda gedən silsilə yazılar az qala maraqlı bir serial kimi oxucular tərəfindən izlənilir. Bu məqaləni oxuculara bir şad xəbər verməklə başlayırıq:

“Yeni Gündəm” xəbər verir ki, pansionatın sakini, uzun müddət ən adi hüquqları uğrunda mübarizə aparmış 70 yaşlı Hüseynağa Nuriyev pansion direktoru Samirə Mehtiyevanın ona dəli damğası vurmağa çalışaraq Maştağadakı 1 saylı Respublika Psixiatriya Xəstəxanası üzərindən saxta nevrasteniya diaqnozu ilə göndərdiyi Gəncədəki eyni profilli müəssisədən geri dönməyə nail olmuşdur. Əlbəttə ki, ilk növbədə Hüseynağa kişinin öz prinsipiallığının və onun problemini ictimailəşdirən KİV-in dəstəyi ilə.

Amma Samirə Mehtiyevanın hegemonluq etdiyi pansionda ədalətsizliklər hələ bitməyib. Əvvəla, haqsızlığa məruz qalan digər sakinlərin heç də hamısında Hüseynağa kişidə olan təpər yoxdur. Zatən Hüseynağa kişinin özünə geri qayıtması münasibətilə telefonla zəng edib gözaydınlığı verdiyimizdə də hiss elədik ki, yəqin basqı altında olduğundan daha “artıq-əskik” danışmaq istəmir, təəccüblü də olsa, ona göstərilən hazırki münasibətdən razılıq edir. Təki o dediyi kimi olsun.

Digərlərini isə passivliyə görə qınamaq olmaz, çünki o yaşları deyil, o enerjiləri də qalmayıb ki mübarizə aparsınlar. Yəqin elə bu tendensiyanı müşahidə edən S.Mehtiyeva pansiona 70-dən aşağı yaşda adamların yerləşdirilməsini istəmir.

Belə ki, bu günlərdə “Yeni İctimai Nəzarət” təşkilatı yaşı 60 civarında olan kasıb, kimsəsiz bir şəxsi sözügedən pansiona yerləşdirmək üçün S.Mehtiyevadan köməklik göstərməsini xahiş edib. Lakin pansion direktoru təşkilat nümayəndələrinə deyib ki, onun rəhbərlik etdiyi müəssisəyə yaşı 70-dən az olan şəxslər qəbul edilmir.

Bunu hansı qanuna, qaydaya, təlimata istinadən dediyini bildirməyib. Aşkar görünür ki, o, qol qoyduğu qanunsuzluqlarla mübarizə aparmaq gücündə olan adamlardan uzaq durmağa çalışır, taqətsiz qocalarla işləməyə üstünlük verir.

Son vaxtlar koronavirusun üçüncü dalğasının başladığı müşahidə olunur. S.Mehtiyeva və əlaltılarının “qayçıladıqları” yemək payından doymayan sakinlər fürsət düşdükcə pansionu tərk etməyə, ətraf mağazalardan alış-veriş etməyə meyllidirlər və bu səbəbdən üz tutduqları kənar ünvanlarda Covid-19 virusuna yoluxurlar. Pansionun 5-ci mərtbəsində yataq xəstələrinin izolyasiyası üçün yer ayrılıb.

Özlərinin gəzmək, öz pullarını (pensiyalarını) özləri xərcləmək iqtidarında olmayan belə sakinlərin bankomat kartlarını müdiriyyət əllərindən alıb özündə saxlayıb. İlk baxışda bu, təəccüblü görünməyə bilər. Amma etibarlı mənbədən bildirilir ki, kartlarından çıxarılan məbləğlərlə xəstələrə alınan ərzaq və digər malların qiyməti arasında böyük fərq var.

Direktor ehtiyatlanıb ki, əgər xəstələr bir yerdə qalsalar, onlara baş çəkən hər hansı iqtidarlı şəxs, məsələn, Nazirlikdən göndərilmiş təftişçi, komissiya üzvü onlara bir-iki sual verməklə bu faktın üstüna aça bilər, xəstələrin də biri digərinin sözünü təsdiqləyər. Buna görə də 5-ci mərtəbədəki həmin izolyatoru təmir adı altında bağlatdıraraq xəstələri ayrı-ayrı otaqlara, yəni, sağlam sakinlərlə eyni otaqlara yerləşdirib ki, bu da yoluxucu xəstəliyin yayılmasına qəsdən şərait yaratmaq deməkdir.

Direktorun rəvac verdiyi bu cinayət ucbatından, habelə lazımi dərman preparatları ilə təmin olunmamamaq səbəbindən ahıl sakinlərdən koronavirus xəstəsi Süleyman kişi bu yaxınlarda dünyasını dəyişib, onunla təmasda olmuş tibb bacısı Ziba və sanitar Bibixanım da yoluxublar.

Bildirilir ki, S.Mehtiyeva keçən ay məzuniyyətə çıxanda onun tapşırığına əsasən pansionun baş mühasibi Akif və direktorun rəfiqəsi Nurlana xəstə sakinlərin əllərindən alınmış plastik kartları daha pansionatın bayır tərəfindəki bankomata deyil, başqa ünvanlardakı bankomatlara daxil etməklə pul çıxarıblar və nağd şəkildə direktora verib istirahətə yola salıblar. Bu ehtiyat tədbiri də onun üçündür ki, iş bərkə düşərsə, ilk növbədə ən yaxınlıqdakı bankomatın qeydə aldığı video-görüntülər araşdırılacaq və kartlardan məhz kimin istifadə etdiyi aşkarlanacaq.

Aldığımız son məlumatlara görə pansionatda dünyasını dəyişən bir ahılın öldükdən sonra ağzında olan 10 ədəd qızıl dişini çıxardıblar. Faktı dəqiqləşdirə bilmədiyimizdən geniş yazmaq istəmədik. Jurnalist araşdırması aparıb növbəti sayımızda geniş məlumat verəcəyik. Mövzuya qayıdacağıq.

P.S. Məqalədə qeyd edilən bütün faktlar mediada dərc edilib və təkzib edilməyib. Qarşı tərəf kimi yazıda adı keçən şəxslərin və qurumların mövqeyini dərc etməyə hazırıq./Deryaz.az