""Ukrtransnafta" Publik Səhmdar Cəmiyyəti (Ukraynanın neft nəqli sisteminin operatoru) gələcəkdə Azərbaycanın "Azeri Light" neftinin Kremençuq Neft Emalı Zavoduna (NEZ) tədarük həcmini artırmağı planlaşdırır".

azia.az xəbər verir ki, bunu Trend-ə açıqlamasında Ukrayna Baş nazirinin müavini, iqtisadi inkişaf və ticarət naziri Stepan Kubiv deyib.

Xatırladaq ki, martın 10-dan "Ukrtransnafta" Odessadan Kremençuqa neft kəməri məntəqəsinin işini yeniləyib və "Azeri Light"ın Kremençuq NEZ-ə nəqlinə başlayıb. Ötən ilin sonunda imzalanmış saziş 2017-ci ildə Kremençuq NEZ-ə ən azı 1,3 milyon ton "Azeri Light" neft növünün nəqlini nəzərdə tutur.

Baş nazirin müavini qeyd edib ki, Azərbaycan neftinin nəqli "Ukrtransnafta"ya 5 ilə yaxındır fəaliyyət göstərməyən Odessadan Kremençuqa neft kəməri məntəqəsinin işini yeniləməyə imkan verir:

"Bu, Ukrayna NEZ-lərinə neft nəqlini, həmçinin Ukrayna üzrə daxili neft nəqli həcmini də artıracaq".

Qeyd edək ki, Kremençuq NEZ 2016-cı ilin dekabrından "Azeri Light" neftini emal edir. Buna qədər isə neft zavoda dəmiryol nəqliyyatı ilə göndərilirdi.

2016-cı ildə Azərbaycan 31,1 milyon tondan çox yüngül neft hasil edib. 2015-ci ildə bu göstərici 31,3 milyon ton olub.

"Azeri Light" neft növü Azərbaycanın "Azəri-Çıraq-Günəşli" neft yataqları blokunda hasil olunur.