Koronavirusun mutasiyası nəticəsində yeni Delta variantının ortaya çıxmasından sonra, Azərbaycan da daxil bir sıra ölkədə 3-cü peyvənd dozası (buster dozası) vurmaq təklif olunub.

Bəs, Azərbaycanda deputatlar 3-cü doza vaksin vurduracaq?

Azia.az bu sualla millət vəkilləri arasında telefon sorğusu keçirdi. Əlaqə yarada bildiyimiz deputatların cavablarını təqdim edirik.


İmişlinin deputatı Razi Nurullayev: 2021-ci ilin martında 2 doza CoronaVac vaksini vurdurmuşam. Sentyabrın 25-də 6 ayım tamam olacaq. Həmin müddətdən sonra 3-cü dozanı vurduracam. Seçimim isə Pfizer olacaq. Çünki vaksinlər barədə oxuduğum məlumatlardan belə aydın oldu ki, sinovakdan sonra Pfizer vaksini vurduranda effekti güclü olur. Həmçinin, xarici ölkələrə gediş-gəlişi asanlaşdırmaq üçün ən ideal seçim Pfizer vaksinidir.


Salyanın deputatı Fəzail Ağamalı: Fevralda 1-ci, martın 4-də isə 2-ci doza CoronaVac vaksini vurdurdum. Sentyabrın əvvəllərində 3-cü doza vaksin vurduracam. Amma hansı vaksini vurduracağım barədə dəqiq qərar verməmişəm. Düşünürəm ki, həkimlərlə məsləhətləşdikdən sonra qərar vermək olar.

Gəncənin deputatı Naqif Həmzəyev: 2 doza CoronaVac vaksini vurdurmuşdum, bir müddətdən sonra antitel analizi verdim. Antitel aşağı düşmüşdü deyə 3-ci dozanı vurdurmaq qərarına gəldim. 3-cü doza olaraq isə Pfizer vaksinini seçdim. Beynəlxalq təcrübələr göstərir ki, yeni delta ştammından qorunmaq üçün Pfizer uğurlu seçimdir. Çin höküməti də öz vətəndaşlarına 3-cü doza olaraq Pfizer vaksini tövsiyyə edib. Hər kəsə məsləhət görərdim ki, 2 doza vaksin olunsalar da mütəmadi olaraq antitel analizi versinlər. Əgər ehtiyac yaranarsa, 3-cü doza vaksin vurdursunlar.

Bakının, Nəsimi rayonunun deputatı, ixtisasca həkim olan Asim Mollazadə: 2 doza CoronaVac vaksini vurdurandan sonra 3-cü doza Pfizer vaksini vurdurdum. Hər kəsə də Beynəlxalq Səhiyyə Təşkilatının tövsiyyələrini yerinə yetirməyi məsləhət görürəm.

Gədəbəyin deputatı Arzu Nağıyev: Öz istəyimlə 2 doza CoronaVac, 3-cü doza isə Pfizer vaksini vurdurdum.

Bakının, Nərimanov rayonunun deputatı Hikmət Babaoğlu: Fevralda 1-ci doza, martda isə 2-ci doza CoronaVac vurdurdum. Sentyabrda 3-cü doza vaksini vurdurmağı düşünürəm. Mütəxxəssislərin fikirlərini, dünya təcrübələrindən xəbərdar olduqdan sonra 3-cü doza olaraq Pfizer vurdurmağı nəzərdə tutmuşam.

Mingəçevir deputatı Aydın Mirzəzadə: Fevralın əvvəlində vaksin olunmuşam, peyvəndin adını xatırlamıram. 3-cü dozanı da mütləq vurduracam. Amma xüsusi bir seçimim yoxdur. Düşünürəm ki, Azərbaycana ancaq sınaqdan keçmiş, effektli vaksinlər gətirilib.

Cəbrayılın deputatı Ceyhun Məmmədov : 2 doza CoronaVac vaksini vurdurmuşam. Əgər tələb edilərsə, eləcə də məsləhət görülərsə, 3-cü doza vaksin də vurduracam. 3-cü dozanı vurduranda da seçimim Sinovak olacaq.