Azərbaycanlı politoloq Türkiyənin iqtisadiyyat nazirinin dediklərini təsdiqlədi

“Türkiyənin iqtisadiyyat naziri Nihat Zeybəkçinin ”əgər 15 iyulda hərbi çevriliş uğurla nəticələnsəydi, Türkiyə torpaqlarının bir hissəsi iki dövlətə - Ermənistana və Kürdüstana veriləcəkdi" açıqlaması həyəcan təbili üçün əsasdır". “Atlas” Araşdırmalar Mərkəzinin rəhbəri, politoloq Elxan Şahinoğlu bunu “Yeni Müsavat”a açıqlamasında bildirdi.

Ekspert razılaşır ki, hərbi çevrilişə cəhdin qarşısının alınmadığı təqdirdə Türkiyədə və bölgədə doğrudan da böyük fəlakətlər baş verəcəkdi: “Mənim çevrilişə cəhdin səhəri günü verdiyim açıqlama bundan ibarət idi ki, çevrilişçilər istəklərinə nail olsaydılar, Türkiyədə Suriyadakına bənzər vətəndaş müharibəsi başlayacaqdı, ordu və cəmiyyət iki, üç, dörd hissəyə bölünəcəkdi. Çünki ordunun, polisin və cəmiyyətin əksər hissəsi FETÖ-nün əmrlərinə tabe olmayacaqdılar, bu isə silahlı toqquşmalara şərait yaradacaqdı. Allaha şükür ki, bunlar olmadı. Türkiyənin iqtisadiyyat nazirinin sözlərinə gəldikdə isə Kürdüstanı anladım, PKK Türkiyənin şərqində fəaliyyətini genişləndirəcəkdi və qopma real çizgilər daşıyacaqdı. Bəs Ermənistan Türkiyədən necə torpaq qoparacaqdı? Ermənistanın təkbaşına hətta ”dağılmış" Türkiyədən torpaq qoparmaq təşəbbüslərinə girişməsi real deyil. Əksi olsaydı, Dağlıq Qarabağda da müharibə qaçılmaz olacaqdı. Biz Ermənistanın Türkiyə hesabına torpaqlarını genişləndirməsinə seyrçimi qalacaqdıq?"

E.Şahinoğlu onu da təsdiqləyir ki, bu halda işə Rusiya qarışacaqdı: “Yəni hər yer toz-duman olacaqdı. Rusiyanın da Türkiyənin qanuni hakimiyyətini gözardı edərək Ermənistanın Türkiyədən torpaq qoparmaq təşəbbüsünə dəstək verəcəyini düşünmürəm. Putin Krımı işğal edə bilər, Qarsın işğalı onluq deyil. Nihat Zeybəkçinin məntiqindən çıxış etsək, Ermənistana Türkiyədən torpaq qoparmaq işində dəstək verəcək dövlət Rusiya deyilsə, qalır - Amerika Birləşmiş Ştatları. Ancaq Vaşinqtonun da NATO dövlətini parçalayaraq Rusiyanın hərbi-strateji müttəfiqinə torpaq pay verməsi məntiqli görünmür. Buna baxmayaraq, çevriliş nəticəsində Türkiyədə vətəndaş müharibəsi başlasaydı, Suriya timsalında olduğu kimi, qardaş ölkənin də parçalanması planlarını gündəmə gətirənlər tapılacaqdı. Mən bu fikirlərimi paylaşırkən, bəzi dostlarım mənə irad tuturlar ki, hərbi çevriliş uğur qazansaydı belə, Türkiyə bölünməyəcəkdi və misal olaraq qardaş ölkədə baş verən digər hərbi çevrilişləri göstərirlər. Məsələ burasındadır ki, FETÖ-nün planlaşdırdığı 15 iyul çevrilişi bundan əvvəlki heç bir çevrilişə bənzəmir”.

Ekspert xatırlatdı ki, Türkiyədə sonuncu hərbi çevriliş 1980-ci ildə baş verib: “General Kənan Evren Türkiyəni sağ-sol toqquşmalarından, küçə və meydanları qan gölünə çevirənlərdən qurtarmaq üçün çevriliş etmək məcburiyyətində qaldı. Çevrilişsiz keçinmək mümkün idimi? Bəlkə də mümkün idi, çünki üstündən az qala 40 ilə yaxın vaxt keçdikdən sonra bəziləri deyir ki, Evren Türkiyəni illərlə geri saldı, günahsız insanlar həbs olundu, PKK yarandı, Avropa Birliyinə üzvlük ləngidi və s. Əlbəttə, 1980-ci illərin ağır durumunu xatırlamadan hazırda bu haqda fikir yürütmək asandır. Yenə qayıdıram, 15 iyul çevriliş cəhdinə. Fətullah Gülən hərəkatı mason lojasına bənzəyir, dövlət içində dövlət qurublar, dövlət strukturlarını özlərinin və xarici ağalarının xidmətinə yönəltmişdilər. Kənan Evren arxasına ordunu alaraq çevriliş etmişdi, FETÖ isə ordunu parçalayaraq çevriliş etmək istəyirdi. Kənan Evren çevriliş günü əsgər və zabitlərinə ”qarşınıza çıxanı güllələyin" əmri verməmişdi, FETÖ üzvləri xuntaçılar isə nəinki günahsız insanları qətlə yetirdilər, Türkiyə tarixinə qara ləkə yazaraq parlamenti gülləbaran etdilər".