Cəbrayıl, Qubadlı və Zəngilan rayonlarında Bərpa, Tikinti və İdarəetmə Xidmətinin, Azərbaycan Fotoqraflar Birliyinin (AFB) təşkilatçılığı ilə Cəbrayıl Şəhərində “Obyektivdə Zaman və Memarlıq” adlı Foto Müsabiqə keçiriləcək.

Müsabiqə Azərbaycan Respublikasının Prezidenti Ilham Aliyev tərəfindən imzalanmış müvafiq Sərəncama əsasən 2026-cı ilin ölkəmizdə “Şəhərsalma və Memarlıq İli” elan olunmasına həsr edilib.

Cəbrayıl şəhəri Mehdi Mehdizadə adına tam orta ümumtəhsil məktəbinin yuxarı sinif şagirdləri arasında keçirilən foto mobiloqrafiya müsabiqəsinin məqsədi şəhərsalma və memarlıq dəyərlərinin təbliği, gənclərin yaradıcılıq potensialının inkişafı, azad olunmuş ərazilərin yeni simasının ictimai təqdimatı, həmçinin memarlıq irsinin və müasir quruculuğun tanıdılması, şagirdlərin praktik fotoqrafiya bacarıqlarının inkişafı, gənclərin şəhərsalma proseslərinə marağının artırılması və Cəbrayılın vizual arxivinin yaradılmasıdır. 

Eyni zamanda, şagirdlərdə məskunlaşdıqları əraziyə, şəhər/kənd mühitinə estetik baxışın formalaşdırılması və mobiloqrafiya vasitəsilə onların yaradıcılıq potensialının inkişaf etdirilməsi də hədəflənir.

Layihə çərçivəsində şagirdlər üçün mobiloqrafiya üzrə təlim keçirilib. Təlim Azərbaycan Fotoqraflar Birliyinin üzvləri Mirnaib Həsənoğlu və Fərhad Sultanov tərəfindən aparılıb. Mirnaib Həsənoğlu fotoqrafiya tarixi və Azərbaycan fotoqrafiyası barədə, Fərhad Sultanov isə mobiloqrafiya üzrə təlim keçib.

Təlim zamanı iştirakçılara mobil fotoqrafiyanın əsas prinsipləri, düzgün kadr quruluşu (kompozisiya), işıqdan effektiv istifadə, rakurs seçimi və vizual hekayə quruculuğu barədə ətraflı məlumat verilib. Eyni zamanda, portret və həyat tərzi (“lifestyle”), “Zamanın memarı” kateqoriyaları üzrə çəkiliş xüsusiyyətləri, şəhər mühitində memarlıq elementlərinin düzgün təqdim edilməsi, həmçinin mobil tətbiqlər vasitəsilə ilkin foto redaktə üsulları izah olunub.

Qeyd edək ki, şagirdlər tərəfindən çəkilərək təqdim olunan işlər qiymətləndirmə mərhələsindən keçiriləcək. Daha sonra  uğurlu şəkillərdən ibarət sərgi təşkil olunacaq. Sərgidə qalib olan şagirdlərə hədiyyələr və sertifikatlar təqdim ediləcək.